OPEC+ zgjat shkurtimet kolektive deri në 2025-ën – Do të prodhojë 39.725 milionë fuçi në ditë vitin e ardhshëm

Organizata e Vendeve Eksportuese të Naftës dhe aleatët e saj, të njohur kolektivisht si OPEC+, ranë dakord të zgjasin shkurtimet e tyre zyrtare të prodhimit të naftës së papërpunuar deri në vitin 2025, duke shtrirë gjithashtu dy grupe të tjera frenimi të furnizimit për periudha të ndryshme.

Vendimi erdhi në përputhje me parashikimet e analistëve dhe delegatëve të OPEC+, të cilët thanë përpara takimit se aleanca ka të ngjarë të zgjasë shkurtimet e saj ekzistuese.

Sipas një politike zyrtare, koalicioni do të prodhojë së bashku 39.725 milionë fuçi në ditë vitin e ardhshëm, kjo sipas një tabele të publikuar nga Sekretariati i OPEC-ut.

Ky ndryshim përfshin gjithashtu një rritje të prodhimit të Emirateve të Bashkuara Arabe me 300,000 fuçi në ditë, e cila do të kalojë gradualisht duke filluar nga janari 2025 deri në fund të shtatorit të vitit të ardhshëm.

Në një deklaratë të dhënë nga agjencia shtetërore e shtypit Saudit, një nëngrup i aleancës OPEC+, duke përfshirë “mbretërit” e këtij sektori, Arabinë Saudite dhe Rusinë, u tha se do të zgjeronin një grup prej afro 1.7 milionë fuçish që ishin caktuar deri në fund të këtij viti. Këto reduktime tani do të zbatohen gjatë gjithë vitit 2025.

Ky grup më i vogël i anëtarëve të OPEC+ do të zgjasë gjithashtu një raund tjetër të shkurtimeve vullnetare të prodhimit me një total prej 2.2 milionë fuçi në ditë deri në fund të tremujorit të tretë të këtij viti. Këto shkurtime fillimisht ishin planifikuar të zgjasin vetëm deri në fund të tremujorit të dytë. Sasitë e këtij reduktimi, që arrijnë në 2.2 milionë fuçi në ditë, më pas do të rikthehen gradualisht, në baza mujore, deri në fund të shtatorit 2025.

Një grup ministrash që përfaqësojnë vendet që po zbatojnë shkurtime vullnetare u mblodhën në kryeqytetin saudit Riad për bisedime më 2 qershor, që përkon me takimet teknike më të gjera të OPEC, OPEC+ dhe koalicionit të së njëjtës ditë. Gjatë një konference për shtyp të dielën, ministri saudit i Energjisë, Abdulaziz bin Salman, theksoi se ky takim nuk ishte rezultat i ndonjë tensioni midis anëtarëve, por u thirr për t’u siguruar që do të ndërveprojnë me njëri-tjetrin.

Adelina Onuzi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.