Paguhen 2.53 mld lekë për koncesionet – Transfertat e thesarit deri në 23 maj, buxheti ka planifikuar 14.3 mld lekë 

Koncesionet dhe kontratat e partneritetit publik privat kanë marrë 2.53 mld lekë nga 1 janari deri në datën 23 maj të këtij viti, përmes transaksioneve të thesarit. Sipas të dhënave nga Open Data Albania vlera më të madhe deri më tani është paguar për koncesionin e ndërtimit të Rrugës së Arbrit, me 960 mln lekë të transferuara. Kjo vlerë, është sa 25% e totalit të planifkuar në buxhet, që për vitin 2024 është 3.5 mld lekë. Një koncesion në sektorin shëndetësor zë vendin e dytë.

Koncesioni i shërbimit të laboratorëve ka arkëtuar nga thesari rreth 574 mln lekë, teksa plani vjetor për pagesa për këtë koncesionar është 1.85 miliard lekë. Më pas renditet PPP e inceneratorit të Tiranës, që vijon të përthithë para nga thesari përmes Bashkisë së Tiranës dhe bashkive të tjera kontraktore. Nga 1 janari deri me 23 maj shoqëria ka përfituar para’ publike përmes thesarit në vlerën 445.6 mln lekë.

Po ashtu, të dhënat tregojnë se për kontratën e PPP për rrugën e Kombit janë likuiduar 310.9 mln lekë, teksa planifikimi vjetor për të është 748 milion. Një tjetër kontratë është ndërtimi dhe mirëmbajtja e segmentit rrugor Porti i Jahteve Orikum – Dukat, teksa shoqëria zbatuese është paguar këto 5 muaj në vlerën 208.63 mln lekë.

Planifikimi vjetor për këtë konsesion është 976 milion lekë. Ndërkaq, një tjetër PPP me mbështetje buxhetore në Bashkinë e Tiranës është ajo për ndërtimin e shkollave, për të cilin planifikimi vjetor është 745 milion lekë, teksa nga janar maj janë paguar 31 415 250 Lekë.

Tre kontrata të tjera koncesionare me mbështetje buxhetore i përkasin sektorit shëndetësor dhe përfshijnë, hemodializën, check -up dhe sterilizimin, por shoqëritë zbatuese nuk paguhen përmes thesarit. Pagesat bëhen përmes Fondit të Sigurimit të Detyrueshëm të Kujdesit Shëndetësor. Për vitin 2024 në total buxheti i shtetit ka planifikuar pagesa për kontratat koncesionare në vlerën prej 14.3 mld lekë.

Ola Mitre/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.