Paketa e deeuroizimit, a po i jep efektet e saj? – Raporti i BSH/ Kreditë dhe depozitat në valutë pësuan rënie në 6-mujorin e parë

Ledina Elezi/SCAN

 

Efektet e masave të deeuroizmit janë ndjerë pikësëpari në pakësimin e kredive në valutë në raport me totalin e kredive. Referuar raportit të Bankës së Shqipërisë, vlera e treguesit zbriti në 45.6% në fund të qershorit 2024, ose 1.5 pikë përqindje më pak se në fund të dhjetorit 2023. Gjatë kësaj periudhe, kreditë në valutë shënuan rënie, ndërsa në lekë vazhduan rritjen.

Nga ana tjetër, ka pasur edhe një rënie të lehtë të peshës së depozitave në valutë dhe rritje të mëtejshme të depozitave në monedhën vendase me afat mbi një vit. Konkretisht, në fund të gjashtëmujorit të parë 2024, treguesi që mat peshën e depozitave në valutë ndaj totalit të depozitave shënoi nivelin 53.3%. Niveli i raportit pësoi rënie të lehtë me 1.0 pikë përqindje krahasuar me gjashtëmujorin e kaluar dhe u ul me 1.4 pikë përqindje llogaritur me një vit më parë.

Gjithashtu, në fund të gjysmës së parë të vitit ka pasur një rënie të peshës së aktiveve likuide në valutë ndaj detyrimeve afatshkurtra në valutë, megjithëse vazhdon të mbetet mbi nivelet minimale rregullatore. Ky tregues në nivel sektori është ulur gjatë periudhës me 1.2 pikë përqindje, duke arritur nivelin 29.4% në fund të qershorit 2024. Krahasuar me një vit më parë, treguesi është rritur me 0.7 pikë përqindje.

Që prej vitit 2018, Banka e Shqipërisë po zbaton një paketë masash, me qëllim uljen e përdorimit të monedhave të huaja dhe nxitjen e përdorimit të monedhës vendase. Paketa e deeuroizimit përmban tre elemente kryesore që përfshijnë diferencimin e normës së rezervës së detyrueshme për detyrimet në valutë dhe ato sipas afatit të maturimit në lek, kërkesa më të larta për treguesit e likuiditetit në valutë dhe ndërgjegjësimin e huamarrësve për rrezikun që paraqet huamarrja në valutë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.