Përfundon projekti për rrugët lokale dhe rajonale – Raporti i BB: Përfshiu 10 mijë km rrugë. Dy kontrata janë ende aktive
Projekti 50 milionë dollarë për rrugët lokale dhe rajonale, i mbështetur me kredi nga Banka Botërore ka përfunduar në fund të qershorit, teksa në vlerësimin final ecuria e projektit ka marrë notën “Kënaqshëm”, që është rankimi më i lartë. Gjithsesi, sipas raportit të publikuar 2 kontrata janë ende aktive dhe në rast të lindjes së kostove shtesë, ato do të mbulohen nga Fondi Shqiptar i Zhvillimit.
Kontrata e parë përfshin aksin Tushemisht – Pogradec, ku sipas BB-së punimet kanë përfunduar në masën 75%. Shkak për vonesën është bërë kompensimi dhe lehtësimi i zhvendosjes së 3 familjeve që prekeshin nga projekti.
Kontrata e dytë përfshin unazën “Vath Korreshi” në Bashkinë Lushnje dhe seksioni rrugor Spille, në Bashkinë Rrogozhinë, ku punimet janë përfunduar në masën 70%. “Në pjesën e unazës, u desh pak kohë për të adresuar ankesën e drejtorisë së shkollës, ndërsa në seksionin Spille pati një vonesë të konsiderueshme për të marrë lejen e Ministrisë së Mbrojtjes për hyrje të plotë në terren”, – shpjegon banka në raportin e saj.
Kredia prej 50 milionë euro u aprovua në prill 2018 dhe u bë efektive në 1 tetor të po atij viti. Fillimisht, disbursimi i saj parashikohej të përfundonte në vitin 2022, por më pas afati u shty deri në qershor 2024. Projekti mbuloi rreth 10,000 km rrugë rajonale dhe lokale, teksa përveç ndërhyrjeve bashkitë përvetësuan parimet e Planit të Mirëmbajtjes.
Ola Mitre/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.