Projekti 1 mld për litiumin “nxit” debat lokal – Francezët shprehin shqetësimet për pasojat mjedisore të impiantit

Kristi Ceta/SCAN

 

Një projekt prej 1 miliard euro për litiumin, që do të bëhet operacioni më i madh i minierave në Francë në dekadat e fundit, po provokon debat të nxehtë lokal.

Pesë muaj diskutime publike në Allier, një ish-qendër industriale në Francën juglindore, tregojnë ndarjen e popullsisë lokale mbi planin. Banorët kanë shprehur shqetësimet e tyre për çështje që përfshijnë ndotjen e mundshme të ujit, konsumin e madh të energjisë dhe kimikatet e përdorura në procesin e minimit dhe përpunimit të materialeve.

Disa prej tyre sfiduan gjithashtu domosdoshmërinë e projektit, përmes të cilit kompania franceze e minierave Imerys synon të furnizojë mjaftueshëm litium për të prodhuar bateri për më shumë se 660,000 automjete elektrike në vit, duke nisur nga 2028.

Në një përpjekje për të frenuar emetimet e gazeve serrë, BE planifikon të ndalojë shitjen e makinave të reja që përdorin lëndë djegëse fosile deri në vitin 2035 dhe të bindë qytetarët e saj të drejtohen tek elektriciteti. Ky vendim ka kthyer fokusin e bllokut te litiumi, një komponent kyç i baterive të makinave elektrike dhe një mineral kritik, nga i cili Evropa është pothuajse plotësisht e varur nga Kina. Për të rritur nxjerrjen vendase të litiumit, firmat po ndjekin plane për të hapur miniera të reja në vende të tilla si Gjermania, Austria dhe Portugalia.

Por ka pasur protesta të konsiderueshme në të gjithë kontinentin, më së shumti në Serbi, ku mijëra dolën në rrugë këtë verë pasi qeveria ra dakord të furnizonte BE-në përmes një projekti të ri për litiumin.

Pavarësisht dyshimeve lokale, qeveria franceze tashmë ka ndërmarrë hapa për të përshpejtuar projektin. Në korrik, ajo i etiketoi planet si “një projekt me interes të madh kombëtar”. Ky etiketim e lejon Imerys të marrë miratimin administrativ më shpejt, pasi Franca e sheh projektin të rëndësishëm për tranzicionin ekologjik dhe sovranitetin kombëtar.

Institucioni kombëtar për studimet gjeologjike thotë se pjesa më e madhe e potencialit të litiumit në vend pritet të gjendet në Beauvoir. Nxjerrja e tij mund të sigurojë një avantazh konkurrues për industrinë e makinave të vendit. Gjithashtu, ky projekt e vendos Francën në rrugën e duhur për të përmbushur qëllimin e Presidentit Macron, i cili synon dy milionë automjete elektrike dhe hibride deri në vitin 2030.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.