Projekti: Fotovoltaikë në varreza! – Valencia kthen varrezat në termocentral urban diellor

Instalim panelesh fotovoltaike në varreza. Është kjo ideja e këshillit bashkiak të Valencias, duke shfrytëzuar faktin se në qytetin spanjoll regjistrohen plot 300 ditë me diell në vit. Objektivi është transformimi i tij në termocentralin më të madh urban diellor

Valencia, në Spanjë ka rreth 300 ditë me diell në vit, por edhe shtatë varreza. Qyteti spanjoll, i cili këtë vit është Kryeqyteti i Gjelbër Europian, arrin të kombinojë me shumë sukses konceptet diametralisht të kundërta duke instaluar fotovoltaikë në varrezat urbane si pjesë e tranzicionit energjetik.

Sipas këshillit të qeverisjes vendore të Valencias, qëllimi është ndërtimi i termocentralit më të madh urban diellor në Spanjë me një buxhet prej më shumë se 3 milion eurosh. Si pjesë e projektit “Requiem in Power” – RIP, panele diellore do të instalohen në çatitë e pesë varrezave komunale të qytetit spanjoll.

Varrezat që do të shndërrohen në zona të energjisë të gjelbër janë: El Grau, Benimaclet, Campanar, Cabanyal-Canyamelar dhe General, në çatitë e të cilave do të instalohen rreth 7.000 panele diellore me synimin për të prodhuar 3.388.530 kilovat energji elektrike. Energjia e prodhuar do të furnizojë gjithashtu grupet dhe familjet vulnerabël si dhe ndërtesa komunale. Janë gjithsej 1.000 shtëpitë mund të furnizohen nga prodhimi i energjisë fotovoltaike në varreza.

810 sistemet e para tashmë janë instaluar në tri prej varrezave, që do të thotë se gjithsej do të prodhohen më shumë se 440 mijë kilovat në vit dhe do të kursehen më shumë se 140 tonë dioksid karboni në vit.

Pasi të përfundojë projekti, qyteti spanjoll me arkitekturën mbresëlënëse do të bëhet një nga qytetet kryesore europiane në kursimin e energjisë, efikasitetin dhe qëndrueshmërinë pasi vlerësohet të kursejë më shumë se 1.000 ton dioksid karboni në vit.

Me këtë sistem energjia prodhohet brenda strukturës urbane dhe konsumohet nga qyteti pa asnjë humbje në transportin e tij, prandaj është më efikas. Falë këtij projekti do të “hapen” më shumë se 100 vende pune për montimin dhe mirëmbajtjen e paneleve.

Valencia nuk është qyteti i parë spanjoll që instalon njësi energjetike në varreza, pasi në fillimi projekti është zbatuar në varrezat Santa Coloma de Gramanet në Barcelonë ku u aplikua e njëjta metodë. Megjithatë, plani i ri i Valencias parashikohet të jetë pothuajse pesë herë më efikas se ai i Andaluzisë. E njëjta ide po zbatohet edhe në rajonin Saint-Josham të Francës Perëndimore, ku deri në vitin 2025 do të përfundojë instalimi i paneleve në të gjithë varrezat, me vlerësime që sugjerojnë një kursim prej 150-250 euro në energji elektrike për çdo familje në qytet.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.