Rama me emigrantët në Itali: Keni arsye për të qenë krenarë! 421 mijë prej jush përfitojnë nga marrëveshja e pensioneve

Për gati një orë kryeministri Edi Rama mbajti fjalim në pallatin e sportit në “Busto Arsizio’’, lokalitet afër qytetit të Milanos i mbushur me shqiptarë, të cilët e pritën me flamuj kuq e zi. Kryeministri Edi Rama shprehu mirënjohje të thellë ndaj emigrantëve shqiptarëve që jetojnë në Itali

“Jam thellësisht i prekur. Dua ta dini që më ka emocionuar vala e nxehtë e përshëndetjeve të shumë shqiptarëve që më kanë shkruar për t’i vizituar. Ju shqiptarët e Italisë, jeni shëmbëlltyra rrezatuese e pararojave shqiptarë të ribashkimit me Evropën. Ju jo politika, jo media e as biznesi, jeni përbashkuesit më kryesorë të dy brigjeve të Adriatikut. Jeni fuqia më e madhe e rikthimit të Arbërisë së vjetër dhe Shqipërisë së re të qytetërimit europian. Ju jeni krenaria shqiptare”- ka thënë kryeministri Rama.

Rama theksoi se nga marrëveshja me pensionet me Italinë përfitojnë 421 mijë shqiptarë.

“Afro çerek milioni prej jush jeni qytetarë italianë, 3/5 e juaja jeni përqendruar në veriun e Italisë. Janë mbi 40 mijë sipërmarrje shqiptare këtu në shtetin italian. 421 mijë shqiptarë do të përfitojnë nga marrëveshja e sapolidhur e pensioneve me Italinë. Ju heshtët zilen e paragjykimit të tmerrshëm, që iu shoqëroi drejt triumfit tuaj, si europianët e rinj të Italisë. Edhe Shqipëria po fiton betejën e saj të drejtë në kërkim të kurorës të munguar të drejtësisë, me Zot, ligj dhe zakon në familjen e shteteve të Europës. Ju jeni pjesë e familjes europiane. Shqipëria nga një vend i rrezikshëm, sot është ndryshe. Nëse dikush ju sheh shtrembër, keni të gjitha arsyet t’i thoni nëse ka ndonjë gjë këtu. Shqiptarët janë sot krenar për Shqipërinë.”- Ka shtuar kryeministri Rama.

Alida Lula /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.