Reduktim taksash për makinat elektrike – Gjermania synon të nxisë promovimin e tyre pas rënies së shitjeve

Kristi Ceta/ SCAN

Qeveria gjermane pritet të ulë taksat për të promovuar përdorimin e makinave elektrike. Gjermania po synon të rrisë shitjet e automjeteve elektrike, regjistrimet e reja të të cilave ranë me 36.8% këtë korrik, krahasuar me të njëjtën periudhë vitin e kaluar.

Sipas propozimit, kompanitë do të jenë në gjendje të zbresin deri në 40% të vlerës së automjeteve elektrike të blera rishtazi dhe të kualifikuara me emetim zero nga fatura e tyre tatimore një vit pas blerjes, duke rënë në mënyrë progresive në 6% në vitin e gjashtë.

Qeveria vlerëson se masa do të kishte një kosto mesatare vjetore prej rreth 465 milionë eurosh midis 2024 dhe 2028, viti kur do të skadonte zbritja e taksave.

Për më tepër, trajtimi tatimor preferencial i aplikuar aktualisht për makinat elektrike të kompanive dhe me emetim zero me vlerë më pak se 70,000 euro do të zbatohej gjithashtu për makinat me vlerë 95,000 euro ose më pak, sipas të dhënave.

Ministria e Ekonomisë theksoi se do të vazhdojë të mbështesë tranzicionin e industrisë gjermane të makinave drejt automjeteve elektrike, pasi Volkswagen tha se mund të mbyllë fabrikat në Gjermani për herë të parë në historinë e kompanisë.

Prodhuesit kinezë të automjeteve po pushtojnë tregun aziatik që dikur i takonte Wolkswagen. Shitjet e kompanisë në Kinë kanë rënë nga 4 milionë në 2017 në rreth 2.5 milionë në vitin 2024. Gjithashtu, Pekini po sjell makina elektrike me çmime të lira edhe në Evropë, një tjetër treg i rëndësishëm për gjigantin gjerman.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.