Rezervat europiane të gazit, në duar të privatit – Nga Italia, në Holandë vetëm rreth 10% e depozitave kontrollohen nga shteti

Depozitat e gazit natyror të vendeve europiane aktualisht janë me kapacitet mesatar që arrin në 92%. Por, e vërteta e hidhur është se nga Italia në Holandë, vetëm rreth 10% e depozitave kontrollohen nga autoritetet qeveritare. Pjesa tjetër është në duart e të kompanive tregtare dhe konglomerateve industriale që kanë liri absolute për t’i shitur atij që u ofron atyre më shumë fitim.

Rrjeti i gazit natyror supozohet të mundësojë rrjedhjen e furnizimeve të disponueshme midis tregjeve të ndryshme, por nuk është testuar në një krizë. Sipas një analisti në “Wood Mackenzie”, shumë do të varet nga sa i ashpër do të jetë dimri. Nëse është shumë ftohtë, stoqet do të bien nën 10% deri në fund të marsit.

Për të shmangur një krizë energjetike, qeveritë europiane mund t’i shpallin vendet e tyre në gjendje të jashtëzakonshme. Në këtë rast Shërbimi Federal i Rrjetit Gjerman, si të gjitha autoritetet e tjera kompetente kombëtare, do të jetë në gjendje të vendosë nëse gazi do të mbetet në rezervuarë, apo nëse do të pompohet për të mbuluar disa nevoja. Në rast të një problemi në sistem, vendet fqinje mund të ndihmojnë njëri-tjetrin duke plotësuar mangësitë.

Gjermania është më e varura krahasuar me të tjerat pasi depozitat e saj mbulojnë vetëm 25% të kërkesës vjetore. Dhe ndërsa ka mjaft kapacitete magazinimi në rezervuarët e saj, ajo tenton t’i drejtohet rezervave të Austrisë fqinje për të siguruar furnizim me energji, pasi gati gjysma e shtëpive të vendit përdorin gaz natyror për ngrohje. Austria tenton të furnizojë me gaz vende të tjera gjatë dimrit, pasi zakonisht vë 2/3 e kapacitetit të saj të ruajtjes në dispozicion të vendeve të tjera.

Republika Çeke dhe Hungaria gjithashtu kanë më shumë kapacitet për ruajtjen e energjisë sesa kanë nevoja të brendshme. Polonia, nga ana tjetër, është në një situatë të paqëndrueshme. Edhe pse është vendi i pestë më i populluar në BE me 38 milionë banorë, ka më pak kapacitet ruajtës se Sllovakia, e cila ka një popullsi prej vetëm 5.5 milionë banorësh.

Sa e rrezikshme është për lojtarët privatë të kontrollojnë rezervat e gazit u tregua në korrik kur kompania gjermane Uniper, importuesi kryesor gjerman i gazit rus, tërhoqi furnizime nga rezervat për t’u shërbyer klientëve të saj kur Rusia ndërpreu ofertën. Lëvizja shkoi kundër planit të qeverisë Sholtz për të mbushur depozitat dhe e detyroi kancelarin t’i jepte kompanisë më shumë kapital. Dhe tani shtetëzimi i Uniper është duke u zhvilluar. Sa i përket flukseve ndërkufitare të gazit, qeveritë duan t’i mbajnë ato si një pjesë thelbësore të tregut europian të energjisë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.