Risi në Gjirokastër, kryebashkiaku Golemi: Do të hapim markatën e parë me produkte bio të zonës

Gjirokastra viteve të fundit ka fituar shumë më shumë popullaritet, duke sjellë turistë te huaj dhe vendas, të cilët interesohen për t’u njohur me një destinacion historik dhe autentik.

Flamur Golemi ishte pjesë e panelit të emisionit INSIDER, në një nga edicionet speciale të realizuara për turizmin e vendit.

Golemi ndau për Scan TV situatën turistike dhe vijueshmërinë, ku për këtë të fundit tregoi risitë në lidhje më markatën bio, ku turistët mund t’i shikojnë dhe shijojnë produktet e zonës.

“Shumë shpejt në diskutim me të gjithë strukturat akomoduese, sidomos ata që ofrojnë pjesën e restoranteve,  do të kemi markatën, tregun e produkteve bio të zonës. Turisti do të shkojë edhe të shijojë produktet e zonës, por shumë e rëndësishme për pjesën e strukturave akomoduese, është fakti që atje do të marrin produktet e zonës, të certifikuara. Shumë shpejt me Bankën Botërore dhe me suportin e Ministrisë së Turizmit, projekti do të jetë gati”

Kryetari i bashkisë gjithashtu theksoi edhe një tjetër risi që po ndodhte në hotelerinë e vendit.

“Gjirokastra po shkon drejt turizmit elitar. Turizmi tashmë është industri, edhe në sajë të investimeve, edhe në sajë të shërbimeve. Ajo që po ndodh dhe që është risi janë  kërkesat e para të hoteleve brand me më shumë se 100 dhoma. Pra, Gjirokastra tani i ka të gjitha.”

Ndryshimet që po bëhen në qytet pritet të sjellin progres në turizmin e vendit, duke akomoduar dhe plotësuar të gjitha nevojat e vizitorëve, qofshin ata vendas apo të huaj.

Adelina Onuzi/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.