Rriten regjistrimet e automjeteve në Europë – Pjesa më e madhe janë elektrike dhe të kompanive

Të dhënat për regjistrimet e makinave në Europë, në zonën e BE-së, EFTA dhe Britaninë e Madhe, tregojnë për një rritje prej 20.7% krahasuar me të njëjtën periudhë të vitit 2022, rezultat që kontribuon në rikuperimin e vëllimeve që nga fillimi i vitit. Në periudhën janar-gusht rritja ishte 17.9% në 8 milionë e 516.943 njësi, por diferenca krahasuar me vitin 2019 është ende e rëndësishme dhe korrespondon me mbi dy milionë automjete, me një hendek përqindjeje prej 21.4%.

Në këtë kontekst, dy prodhuesit kryesorë europianë, Volkswagen dhe Stellantis, po shënojnë rezultate pozitive por po udhëtojnë me shpejtësi të ndryshme: gjermanët kanë raportuar një rritje të regjistrimeve prej 24.2% që nga fillimi i vitit me një pjesë tregu prej 26% më shumë se një vit më parë; nga ana tjetër firma italo-franceze shënoi një rritje prej 4.3%, por humbi dy pikë të pjesës së tregut midis 2023-shit dhe 2022-shit, veçanërisht për shkak të performancës së Fiat dhe Citroen.

Renault po i afrohet 10% të tregut në Europë falë rritjes së regjistrimeve që kalon 20% në muaj dhe që nga fillimi i vitit, ndërsa tendenca e rritjes së Hyundai, Toyota, BMW dhe Mercedes mbetet më e kufizuar. Tesla vazhdon marshimin e saj, duke trefishuar numrin e regjistrimeve në gusht dhe duke fituar 2.8% të tregut që nga fillimi i vitit.

Tregu i Europës Perëndimore duket se mbështetet kryesisht nga kërkesa për automjete elektrike, sipas të dhënave të Qendrës së Studimit të Promotorit të udhëhequr nga Gian Primo Quagliano. Modelet BEV – automjete elektrike me bateri, në veçanti, dyfishuan shitjet në të gjithë rajonin në gusht, duke u rritur nga 97.556 regjistrime në gusht 2022 në 196.647 muajin e kaluar.

Nga janari në gusht shkalla e rritjes së automjeteve elektrike zvogëlohet dhe qëndron në +53,6% krahasuar me një vit më parë, me një milion e 284.920 automjete elektrike të regjistruara kundrejt 836.802 në të njëjtën periudhë të 2022-shit, me një rritje të peshës së tregut në 15.1% krahasuar me 11.6% vitin e kaluar.

Rritja e shitjeve të modeleve BEV prek të gjitha tregjet e Europës Perëndimore, me përjashtim të Maltës, por me dallime të rëndësishme: nëse Norvegjia regjistron pjesën më të lartë të regjistrimeve të plota elektrike -83%, Italia mbetet në fund dhe qëndron në 3.9%, vetëm Polonia 3.5%, Kroacia 2.8%, Republika Çeke 2.7% dhe Sllovakia 2.4% janë më keq në nivel performance.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.