Rrugët, 3 kontratat që do të aktivizohen sivjet – Përfshihen akset e korridorit Adriatiko-Jonian

Tre kontrata koncesionare apo partneriteti publik privat për ndërtimin e rrugëve pritet të aktivizohen gjatë këtij viti, sipas të dhënave të përpunuara nga Open Data Albania. Për kontratat, që përfshijnë ndërtimin e 3 akseve të Korridorit Adriatiko – Jonian, janë zhvilluar garat tenderuese, ndërsa pritet pritet firmosja e tyre për nisjen e zbatimit

Projekti i parë përfshin segmentit rrugor Kashar-Pezë-Lekaj. Për këtë projekt është shpallur ftues në 13 shkurt 2023, bashkimi i përkohshëm i 7 shoqërive, me vlerë prej rreth 474,87 mln euro, pa TVSH.

Sipas dokumenteve të tenderit, shteti do të jetë garant për koncesionarin, nëse ky i fundit nuk arrin të plotësojë nivelin e të ardhurave fillestare të planifikuara. Vlera në total e parashikuar për garancinë është 48.5 milionë Euro, për gjithë kohëzgjatjen, ndërkohë të ardhurat e parashikuara për këtë koncesion janë 2.23 miliardë Euro.

Segmenti tjetër është Milot – Thumanë. Edhe për këtë projekt është shpallur vitin që shkoi fitues një konsorcium i përbërë nga 3 kompani, me ofertën prej rreth 44,62 mln euro, pa TVSH. Të ardhurat totale të parashikuara për koncesionarin janë në nivelin rreth 291.6 milionë euro përgjatë gjithë kohëzgjatjes. Gjithashtu për këtë segment rrugor parashikohet një garanci e nivelit të të ardhurave nga shteti, nga viti i parë i operimit deri në vitin 2040, në vlerën maksimale rreth 4.57 milionë Euro.

Kontrata e tretë përfshin segmentin Lekaj-Konjat-Fier. Ky projekt do të zbatohet nga bashkimi i 9 shoqërive, ndërsa vlera e investimi është 320 mln Euro, pa TVSH. Kohëzgjatja e kontratës së PPP është 35 vjet.  Në total gjatë viteve të operimit, shoqëria do të mbledhë rreth 1.29 miliardë Euro nga të ardhurat bazë.

Gjithashtu, për këtë projekt është parashikuar një garanci nga shteti, prej rreth 32,5 milionë Euro. Sipas Open Data Albania, planifikimet e reja në koncesione/PPP, të cilat kërkojnë garantimin e të ardhurave nga Buxheti i Shtetit nënkuptojnë po ashtu rritje të detyrimeve kontingjente me të cilat duhet të përballet shteti shqiptar.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.