Sektori bankar rrëzon bursat – Aksionet e Credit Suisse bien me 63%, të UBS me 12%
Tregjet europiane të aksioneve janë hapur në rënie të konsiderueshme në sesionin e sotëm, pasi realizuan javën më të keqe që nga shtatori i vitit 2022. Indeksi pan-Europian Stoxx 600 e ka nisur ditën në rënie me 1%, ndërsa sektori bankar kryeson humbjet në rënie me rreth 4%. Investitorët në Europë e kanë mirëpritur lajmin se UBS do të blejë rivalin Credit Suisse për 3 miliardë franga apo 3.2 miliardë dollarë.
Në fillim të sesionit të sotëm, aksionet e Credit Suisse ranë me 63%, ndërsa aksionet e UBS e nisën ditën në rënie me 12%. Analistët shprehen se, teorikisht nuk ka arsye që kriza e Credit Suisse të përhapet edhe më tej, sepse ishte më tepër një krizë besimi.
Edhe shumica e tregjeve aziatike u mbyllën në rënie, në sesionin e sotëm. Sipas marrëveshjes, aksionerët e Credit Suisse do të marrin një aksion të UBS për 22.48 aksione të Credit Suisse. Investitorët po presin edhe të dhënat mbi bilancin tregtar të Eurozonës për janarin, që do të publikohen në vonë gjatë ditës së sotme.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.