SHBA, rriten kursimet për pension – Rreth 500,000 amerikanë kanë 1 mln USD në llogaritë e tyre

Kristi Ceta/ SCAN

Amerikanët po shfrytëzojnë tregjet e shëndetshme për të vazhduar ndërtimin e kursimeve të tyre për pension. Në tremujorin e dytë të vitit, numri i llogarive 401(k) me të paktën 1 milion dollarë u rrit me 2.5%, duke arritur në 497,000, sipas raportit të fundit për analizën e pensioneve nga Fidelity Investment. Edhe pse rritja ishte më e butë se në tremujorët e kaluar, kjo rezultoi në balancën e tretë më të lartë mesatare të llogarive të arritur ndonjëherë, prej $127,100 për tremujorin.

Norma totale mesatare e kursimeve 401(k) u rrit pak, duke shkuar në 14.2%, falë kontributeve të punonjësve dhe punëdhënësve që mbetën në nivelet rekord të tremujorit të kaluar. Kjo normë kursimesh është më e afërta që ka qenë ndonjëherë me 15% që ka rekomanduar Fidelity.

Kjo rritje e kursimeve ishte e krahasueshme në të gjitha llogaritë e tjera të pensioneve të Fidelity, përfshirë IRA dhe 403(b). Një 401(k) u jep mundësinë punonjësve të kompanive përfituese të investojnë kursimet për pension; një 403(b) funksionon në mënyrë të ngjashme por është për punonjësit e organizatave jofitimprurëse; dhe një IRA është e krijuar nga individ në institucionin e tij financiar dhe është pa taksa.

Megjithatë, shifrat e kursimeve në të gjithë sektorët ende nuk arrijnë në shumën që amerikanët besojnë se do të kenë nevojë për të dalë në pension dhe të jetojnë rehatshëm. Kjo shifër, e njohur si “numri magjik,” arriti në 1.46 milion USD këtë vit.

Për më tepër, Administrata e Sigurimeve Shoqërore ka paralajmëruar se fondet e trustit që mbështesin 66 milion amerikanë do të shterojnë në vitin 2034 për shkak të një sistemi të mbushur me pensione që nuk arrin të përballojë numrin në rritje të pensionistëve dhe njerëzve që jetojnë shumë më gjatë se më parë.

Këtë vit, më shumë se katër milion qytetarë do të mbushin 65 vjeç, mosha mesatare e pensionit, vala më e madhe e amerikanëve që arrijnë në moshën e pensionit në histori.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.