Skema kombëtare e investimeve 2024 fuqizon akuakulturën – Denaj: Deri në 20 milionë lekë mbështetje për sipërmarrjet

Ernilda Luzi/Scan

 

Skema Kombëtare e Investimeve 2024 po fuqizon sektorin e akuakulturës duke ofruar financim për koshat dhe rrjetat e rritjes së peshkut.

Ministrja e Bujqësisë dhe Zhvillimit Rural, Anila Denaj bëri të ditur nëpërmjet një postimi në rrjetet sociale, se masa e përfitimit shkon në 50% të vlerës totale të investimit, deri në 20 milionë lekë për subjekt.

“Ky investim është një hap konkret për të garantuar zhvillimin e qëndrueshëm të akuakulturës detare dhe për të mbështetur vizionin qeverisës për të arritur 30 mijë tonë peshk akuakulturë deri në 2030”,  theksoi ministrja Denaj.

Me këtë skemë të re synohet fuqizimi i sektorit si dhe rritja e punësimit, duke nënkuptuar më shumë mundësi për shitjen e produkteve të peshkut “Made in Albania” në tregjet eksportuese.

Skema Kombëtare e Investimeve 5 milionë euro, ka hyrë në fuqi dhe pritet të nisë zbatimin më 1 tetor.  Parashikohet që të gjitha investimet që do të bëhen në sera, stalla, në makineri bujqësore dhe peshkim të përfitojnë 50% të vlerës së investimit grant nga shteti. Synimi i skemës është rritja e prodhimit vendas, jo vetëm në bujqësi e blegtori por edhe peshkim.

Ndërsa për blerjen e traktorëve, makinerive dhe pajisjeve për mekanizimin dhe modernizimin e proceseve të punës në fermat bujqësore dhe blegtorale bazuar në faturat tatimore do të jepen në formë granti jo më shumë 5 milionë lekë. Kurse në sektorin e peshkimit vlera e grantit do të jetë deri 20 milionë lekë. Aplikimet e fermerëve do të nisin më 1 Tetor dhe do mbyllen në muajin Nëntor.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.