Tarifa të reja për minierat dhe centralet energjetike – Ndryshimet/Nga oponenca teknike e AKBN, te certifikatat e monitorimit dhe vlerësimit  

Ola Mitre / SCAN

 

Qeveria ka miratuar tarifa të reja për subjektet që ushtrojnë veprimtari minerare, shoqëritë koncesionare të hidrocentraleve apo ato që kanë marrë miratimin për HEC-e apo impiante të tjerë energjisë së rinovueshme. Ndryshimet, prekin tarifat që këto subjekete paguajë pranë Agjencisë Kombëtare të Burimeve Natyrore për oponencën teknike apo shërbime të tjera që jepen nga ky dikaster. Sipas niveleve të reja, oponenca teknike për subjektet minerare do të kushtojë 150 mijë lekë.

Ndërkohë që, për hidroecentralet dhe energjitë e tjera të rinovueshme, sikurse janë centralet fotovoltaike dhe eolike tarifat janë në varësi të fuqisë së instaluar, duke nisur nga 500 mijë lekë për impiantet deri në 1 MW dhe 1.5 mln lekë për centralet mbi 10 MW.

Sipas vendimit të qeverisë, AKBN siguron, brenda fushës së veprimtarisë së vet, oponencën teknike për studimet e projektet në fushën e veprimtarisë minerare, postminerare, hidrokarbure dhe energjetike, të paraqitura nga subjektet, shtetërore a private, vendase ose të huaja. Ndërkaq, sa i takon kompetencave të tjera, specifikohet se AKBN monitoron kontratat koncesionare ose jo objekt koncesioni për centralet prodhuese me burime të rinovueshme, si dhe lëshon certifikatat vjetore të monitorimit për këto centrale. Edhe për këtë shërbim janë përcaktuar tarifat, që variojnë nga 30 mijë lekë, deri në maksimumi 10 mln lekë, sipas madhësisë së impiantit.

Paralelisht është përcaktuar edhe tarifa për hartimin e raporteve të vlerësimit të impianteve energjetike dhe lëshimin e certifikatës së pranimit të veprës, në masën 1 % e vlerës së investuar, por në çdo rast nuk do të kalojë vlerën prej 15,000,000 lekë, pa TVSH.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.