Temperaturat e larta në Evropë – Greqia me shkallën më të lartë të vdekjeve nga nxehtësia

Kristi Ceta/SCAN

 

Temperaturat e larta kontribuan në më shumë se 47,000 vdekje në Evropë në vitin 2023, sipas një studimi të ri që sugjeron se numri i vdekjeve do të kishte qenë edhe më i lartë pa masat zbutëse të vendosura që nga fundi i shekullit.

Viti i kaluar ishte viti më i nxehtë i regjistruar globalisht dhe ndër vitet më të ngrohta në Evropë, që do të thotë se miliona njerëz u prekën nga valët ekstreme të të nxehtit, përmbytjet dhe temperaturat e larta.

Moti i nxehtë mund të shkaktojë urgjenca mjekësore si goditja e nxehtësisë, të rrisë rrezikun që disa sëmundje infektive të përhapen dhe të përkeqësojë gjendjet kronike si sëmundjet e zemrës, diabeti dhe astma.

Vitin e kaluar, rreth 47,690 njerëz vdiqën nga shkaqe të lidhura me nxehtësinë, më pak se afërsisht 60,000 në 2022, por një numër më i lartë se çdo vit tjetër që nga 2015, sipas studimit të botuar në revistën Nature Medicine.

Studiuesit besojnë se numri i vdekjeve do të kishte qenë 80 për qind më i lartë në vitin 2023, nëse qeveritë nuk do të kishin ndërmarrë hapa për t’iu përshtatur ndryshimeve klimatike që nga fillimi i viteve 2000 e tutje.

Shumica e ndryshimeve erdhën pas vitit 2003, kur një verë e zjarrtë çoi në më shumë se 70,000 vdekje dhe bëri që shumë vende evropiane të nisin sistemet e paralajmërimit të hershëm dhe planet për parandalimin e nxehtësisë.

Disa hapa për të ndihmuar njerëzit gjatë valëve të të nxehtit përfshijnë përmirësimin e hidratimit, temperaturat më të ftohta të ambienteve të brendshme, si dhe masa më të gjera të politikave si planifikimi i qytetit duke u orientuar nga klima dhe përpjekjet për të frenuar emetimet e gazeve serrë.

Studiuesit krahasuan të dhënat e vdekjeve me shifrat javore të temperaturës dhe vlerësuan se sa nga ato vdekje ishin rezultat i nxehtësisë.

Në studim, Greqia pa shkallën më të lartë të vdekshmërisë nga nxehtësia në vitin 2023, me 393 vdekje për 1 milion, e ndjekur nga Bullgaria (229), Italia (209), Spanja (175), Qiproja (167) dhe Portugalia (136).

Të dhënat vijnë ndërsa autoritetet greke luftojnë me zjarret pranë Athinës që kanë detyruar spitalet dhe zonat e banuara të evakuohen. Qershori dhe korriku ishin muajt më të nxehtë të regjistruar në Greqi.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.