Google prezanton telefonin e ri Pixel 9 – Inteligjenca artificiale luan rol kryesor në pajisjen e re

Kristi Ceta/SCAN

 

Google i Alphabet zbuloi një linjë të telefonave inteligjentë të rinj Pixel me integrime më të mëdha të teknologjisë së inteligjencës artificiale.

Integrimet e reja të IA përfshijnë një veçori që e ka vetëm Pixel, e cila lejon përdoruesit të kërkojnë informacione të ruajtura në pamjet e regjistruara të ekranit (screenshots). Përdoruesit e Android gjithashtu mund të përdorin Gemini, chatbot i Google, si një mbivendosje në krye të një aplikacioni tjetër për t’iu përgjigjur pyetjeve ose për të gjeneruar përmbajtje.

Pixel 9, modeli bazë i ekranit 6.3 inç, do të shitet me një çmim fillestar prej 799 dollarë, që është 100 dollarë më shumë se modeli i mëparshëm. Ky dhe Pixel 9 Pro XL 6.8 inç do të fillojnë të shpërndahen më vonë në gusht, tha një zëdhënës i kompanisë. Pixel 9 Pro, i cili vjen me një kamera më të mirë, dhe Pixel 9 Pro Fold që mund të paloset, do të dërgohen në shtator.

Inxhinierët e kompanisë rimodeluan pamjen e jashtme të telefonit dhe përfshinë përmirësimet e kamerës, si dhe çipin e ri Tensor G4 të Google.

Google njoftoi gjithashtu të martën versionet e reja të orës së saj inteligjente, Pixel Watch 3 dhe kufjet wireless Pixel Buds Pro 2.

Google gjithashtu shtoi një funksion “Humbja e pulsit” në orën e re Pixel. Kjo veçori përdor algoritme për të përcaktuar nëse zemra e një përdoruesi është ndalur dhe mund të kontaktojë shërbimet e urgjencës. Funksioni do të jetë i disponueshëm në Mbretërinë e Bashkuar dhe në Bashkimin Evropian.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.