Transporti me tren, shifra modeste – Ecuria e projekteve që synojnë përmirësimin e transportit të mallrave dhe pasagjerëve

Ola Mitre / SCAN

 

Mungesa e infrastukturës hekurudhore e ka çuar këtë transport drejt rënies së vazhdueshme, teksa shifrat e pasagjerëve janë tejet të ulta, në raport me transportin rrugor dhe atë ajror. Aktualisht janë disa projekte ku kanë nisur punimet apo janë hedhur hapa drejt projektimit apo financimit të tyre, por deri në përfundim të tyre gjatësia e rrjetit hekurudhor në shfrytëzim në vend mbetet vetëm 253 km. Gjithsesi, teksa shifrat janë tejet të ulta, në raport me të njëjtën periudhë të vitit të kaluar sivjet është shënuar një përmirësim i lehtë.

Kështu, në 4 linjat e shfrytëzueshme Kufi- Gjorm, Durrës–Elbasan, Rogozhinë-Fier dhe Fier-Vlorë, gjatë periudhës prill–qershor të këtij viti u transportuan 143 mijë ton mallra apo 2.8 % më shumë në krahasim me tremujorin e dytë 2023. Ndërkohë që, numri i pasagjerëve për këtë periudhë u regjistrua në 4091, duke shënuar rritje me 24.3 %, krahasuar me 3-mujorin e dytë 2023.

Përmirësimi i i kësaj situate pritet të vijë pas vënies në funksion të linjës së re hekurudhore Tiranë –Durrës dhe degëzimit të ri drejt Rinasit, punimet e së cilës pritet të përfundojnë vitin e ardhshëm.

Paralelisht, është siguruar financimi për rehabilitimin e hekurudhës Vorë – Hani i Hotit, teksa punimet parashikohet të nisn vitin që vjen dhe të përfundojnë në viti 2030. Një tjetër projekt është edhe lidhja hekurudhore Durrës-Prishtinë, që gjithsesi është në fazë projektimi.

Ndërkaq, edhe më i largët duket projekti i hekurudhës Shqipëri – Greqi, me një gjatësi prej 130 km. Rreth 3 vjet më parë, Bashkimi Evropian hapi procedurën për vlerësimin e investimit, por deri më tani nuk ka njoftime publike mbi avancimin e projektit.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.