Tregtia me rajonin pëson rënie të “frikshme” – Me kë shtet shesim dhe blejmë më shumë dhe cilat janë mallrat kryesore?

Shkëmbimet tregtare me vendet e rajonit nuk janë në ditët më të mira. Sipas të dhënave të INSTAT të analizuara nga SCAN TV, rezulton se në gjysmën e parë të vitit ka pasur një rënie të konsiderueshme të tregtisë rajonale e cila kalkulohet në 7.28 miliardë lekë.

Në analizë janë marrë shkëmbimet në vlerë me Kosovën, Serbinë, Maqedoninë e Veriut, Malin e Zi dhe Bosnje Hercegovinën, ku rezulton se krahasuar me periudhën Janar-Qershor 2022, shkëmbimet tregtare në vlerë kanë pësuar një rritje të papërfillshme vetëm me Maqedoninë  e Veriut, ndërsa me vendet e tjera rezulton në rënie. Kështu në total janë shkëmbyer mallra midis Shqipërisë dhe 5 shteteve në rajon në vlerën e afro 69.2 miliardë lekëve në 6 muaj nga 76.4 miliardë që u regjistruan një vit më parë. Shkak për këtë mund të jetë edhe rënia e çmimeve të produkteve përgjatë këtij viti.

Të dhënat tregojnë se vlerën me të madhe të shkëmbimeve të mallrave e kemi me Kosovën e cila në 6 mujor regjistrohet në 25.7 miliardë lekë, ndjekur nga Serbia me 17.1 miliardë lekë, Maqedonia e Veriut, Mali i zi dhe në fund renditet Bosnja dhe Hercegovina me vetëm 2.6 miliardë lekë. Sa i takon grup mallrave më të shkëmbyera mes palëve, rezulton se me Kosovën importojmë më shumë ushqim, pije duhan dhe eksportojmë shumë materiale ndërtimi dhe metale.

Me Serbinë prevalojnë në shkëmbime produktet ushqimore, ndërsa eksportojmë ndjeshëm edhe minerale, lëndë djegëse dhe energji elektrike. Me Maqedoninë e Veriut si në eksport dhe import dominon grupi minerale, lëndë djegëse dhe energji elektrike. Me Malin e Zi shkëmbejmë më së shumti materiale ndërtimi dhe metale ndërsa me Bosnje dhe Hercegovinën grupi ushqim pije duhan.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.