Trendi i ri turistik është “Coolcation” – Kërkon destinacione më të freskëta dhe temperatura nën 30 gradë Celsius

Dorina Kurtaj / SCAN

Ngrohja globale, pasojë e krizës klimatike, sjell të dhëna të reja. Frekuenca dhe intensiteti i nxehtësisë ekstreme, sipas ekspertëve, do të vazhdojë të rritet dhe nga mesi i shekullit të 21-të gjysma e popullsisë së Europës, kryesisht në jug, do të përballet me një rrezik të lartë ose shumë të lartë të presionit të nxehtësisë së verës.

Me rritjen e merkurit rriten edhe tendencat e produktit turistik. Kështu, turistët kundërshtojnë normat tradicionale të verës dhe bëjnë pushime në vende më të freskëta si Skandinavia, duke lënë pas destinacionet tradicionale në jugun europian si Greqia, Spanja dhe Italia, të cilat janë ende destinacionet kryesore.

Duke pasur parasysh të gjitha këto, ‘Coolcation’ – pushime të freskëta po fiton vazhdimisht terren, me turistët që kërkojnë klimë më të freskët, duke shmangur temperaturat që mund të arrijnë 30 apo edhe 40 gradë Celsius.

Umeå, një qytet në Suedi, ku temperatura në korrik arrin 17 gradë Celsius, ka filluar të jetë një destinacion shumë i preferuar turistik.

Aktualisht vizitorë nga Holanda janë gjithashtu ndër ata që kanë zgjedhur Suedinë në vend të Spanjës. Shifrat konfirmojnë trendin e ri. Pushuesit që kërkojnë ‘shpëtim’ nga vapa e padurueshme ka të ngjarë të nxisin industrinë e udhëtimit dhe turizmit të Skandinavisë, e cila vlerësohet të shtojë 124 miliardë dollarë në ekonominë rajonale deri në vitin 2023. Kjo është një rritje prej 6 % nga viti i kaluar, sipas agjencisë Bloomberg.

Kërkimet për fluturime nga aeroportet e Mbretërisë së Bashkuar drejt Kopenhagës, Bergenit, Norvegjisë dhe Stokholmit për këtë verë janë gjithashtu dyshifrore.

Ndryshimet klimatike nuk janë arsyeja e vetme që qëndron pas bumit të turizmit në Skandinavi. Zhvlerësimi i monedhës në Norvegji dhe Suedi i ka bërë këto vende më tërheqëse për të huajt. Rajoni po përfiton gjithashtu në shumë mënyra nga rritja e udhëtimeve pas pandemisë nëpër botë.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.