Turqia po kthehet drejt BRICS – Ankaraja, e “zemëruar” për ngecjen e bisedimeve me BE

Më pak se një vit pas zgjerimit të tij të madh, grupimi BRICS i tregjeve në zhvillim, përfshirë Rusinë dhe Kinën, është gati të forcojë lidhjet me një ekonomi tjetër. Turqia po i afrohet grupit BRICS dhe këtë e bëri të ditur ministri i Jashtëm turk. Lëvizja e saj pasqyron zhgënjimin në rritje të Ankarasë me mungesën e gjatë të përparimit në bisedimet e saj të pranimit në BE.

Siç theksoi ai, “negociatat me vendet anëtare të BRICS po vazhdojnë dhe po shkojnë mirë”, ndërsa sqaroi se “nëse BE do të kishin pasur vullnetin për të bërë një hap përpara me Ankaranë, atëherë këndvështrimi për çështje të caktuara mund të kishte qenë ndryshe”.

Ai shtoi se vendi ka një aleancë ushtarake me NATO-n, por aleanca ekonomike nuk është arritur ende dhe për këtë arsye po shqyrtohen mundësi të reja. Ankaraja është përpjekur të ringjallë bisedimet e ngrira me BE-në, partnerin e saj më të madh tregtar, mbi ofertën e saj për anëtarësim. Në të njëjtën kohë, megjithatë, ajo po promovon aleanca të tjera që vlerëson se do ta ndihmojnë atë të zgjerojë ekonominë e Turqisë prej 1 trilion dollarësh

Grupi BRICS quhet kështu me akronimin e inicialeve të anëtarëve të tij themelues, Brazili, Rusia, India, Kina dhe Afrika e Jugut, vendi i parë që iu bashkua frontit pas formimit të tij. Vendet anëtare të saj po zhvillojnë një sistem kreditimi dhe tregtimi mes tyre që paguhet në monedhat e tyre vendase, gjë që Ankaraja e mirëpret. Synimi i tyre është të kufizojnë ekspozimin e sistemeve të tyre financiare ndaj dollarit, me përpjekjet e tyre të intensifikuara pas vendimit të Perëndimit për të kapur asetet ruse.

Në fillim të vitit 2024, tubimi i tyre u zgjerua duke përfshirë Iranin, Emiratet e Bashkuara Arabe, Etiopinë dhe Egjiptin. Në të njëjtën kohë, megjithatë, shumë vende të tjera kanë shprehur interes për t’u bashkuar me frontin e të ashtuquajturit “Jugu Global”, ndërsa BRICS tashmë po shqyrton kërkesat e shumë vendeve. Për shumë vite, Turqia ka qenë anëtare e Aleancës së Atlantikut të Veriut dhe gjithashtu e sistemit europian të mbrojtjes.

Megjithatë, ajo nuk arriti të çojë përpara bisedimet për anëtarësimin e saj në BE, të cilat në thelb kanë mbetur në ngërç që nga fillimi i tyre në vitin 2005. Arsyeja ka të bëjë me një sërë pengesash me të cilat përballet, ndër të cilat është akuza kryesore që i drejtohet nga BE-ja për mungesën e demokracisë në vend.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.