Ujësjellësit, përmirësohen dy tregues – Uji pa të ardhura dhe arkëtimet, Balluku: Reforma në sektor po jep rezultate

Ola Mitre / SCAN

 

Treguesit e ujit pa të ardhura dhe arkëtimeve për kompanitë e ujësjellësve kanë pësuar përmirësim për periudhën janar – korrik të këtij viti, në raport me të njëjtën periudhë të vitit të kaluar. Sipas të dhënave të publikuara nga ministrja e Infrastrukturës dhe Energjisë Belinda Balluku, niveli i ujit pa të ardhura arriti në 61.5% apo 7% më pak 7 – mujori 2023, kur ky tregues ishte 68.5%. Përmirësimi i këtij treguesi nënkupton se ka një rritje të volumit të ujit të faturuar, në raport me atë që prodhohet.

Nga ana tjetër, gjatë 7 muajve të parë të këtij viti u mblodhën rreth 396 mln lekë më shumë se e njëjta periudhë e vitit të kaluar. Kjo shifër është 13% më shumë, se vlera e arkëtuar nga pagesat e faturave të ujit gjatë periudhë janar – korrik 2023.

Balluku ia atribuon këto rezultate reformës të ndërmarrë në sektorin e ujësjellës-kanalizimeve, gjatë vitit 2022. “Performanca janar – korrik 2024 fakton përmirësim të treguesve teknikë dhe financiarë, krahasuar me një vit më parë”, – shkruajti Balluku në rrjetet sociale.

Reforma parashikon bashkimin e 58 kompanive ekzistuese të ujësjellës – kanalizimeve, në 15 shoqëri me kompetenca të përbashkëta. 51% e aksioneve të shoqërive rajonale të krijuara disponohen nga Ministria e Infrastrukturës dhe Energjisë, ndërsa pjesa tjetër ndahet mes bashkive përkatëse. Aktualisht, janë licencuar nga Enti Rregullator i Ujit 13 shoqëri, ndërsa 2 të tjera janë në proces. Shoqëritë rajonale, që nuk janë licencuar ende janë Tirana, që do të bashkohet me Kamzën dhe Vorën dhe Vlora, që do të bashkohet me Selenicën dhe Himarën.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.