Ujësjellësit rrisin arkëtimet – 18.6% më shumë, norma e pagesës së faturave të ujit arrin në 115%

Ola Mitre / SCAN

 

Treguesi i normës së arkëtimit në ujësjellës-kanalizime ka pësuar përmirësim gjatë muajit gusht të këtij viti, në raport me gushtin e vitit të kaluar, duke ruajtur tendencën e shënuar edhe përgjatë periudhës janar – korrik 2024. Sipas të dhënave të publikuara nga ministrja e Infrastrukturës dhe Energjisë Belinda Balluku, niveli i arkëtimeve në muajin gusht u rrit me 18.6%, duke arritur në 115%, nga 96.4% që ishte në muajin gusht 2023. Niveli i arkëtimeve në masën 115% duket se ka kaluar edhe objektivin prej 105%.

Ndërkaq, sipas të dhënave të publikuara më herët edhe treguesi i ujit pa të ardhura shënoi përmirësim në periudhën janar – korrik të këtij vit, në raport me të njëjtën periudhë të vitit të kaluar. Sipas të dhënave, niveli i ujit pa të ardhura arriti në 61.5% apo 7% më pak se 7 – mujori 2023, kur ky tregues ishte 68.5%. Përmirësimi i këtij treguesi nënkupton se ka një rritje të volumit të ujit të faturuar, në raport me atë që prodhohet.

Balluku ia atribuon këto rezultate reformës të ndërmarrë në sektorin e ujësjellës-kanalizimeve, gjatë vitit 2022. Reforma parashikoi bashkimin e 58 kompanive ekzistuese të ujësjellës – kanalizimeve, në 15 shoqëri me kompetenca të përbashkëta, ndërsa u ndërmor për shkak të performancës së dobët tregtare e kombinuar me nivele të larta të ujit pa të ardhura, humbje financiare dhe borxhe të larta të ndërmarrjeve ekzistuese.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.