Varësia e Evropës nga litiumi – Kërkesa në BE pritet të rritet 12 herë deri në 2030

Kristi Ceta/SCAN

 

Bashkimi Evropian është pothuajse tërësisht i varur nga importi i litiumit, i cili është i nevojshëm për tranzicionin energjetik. Sipas të dhënave nga Komisioni Evropian, kërkesa për litium në Bashkimin Evropian pritet të rritet 12 herë deri në vitin 2030.

Depozitat evropiane të litiumit synojnë të ndihmojnë BE-në të fitojë pavarësinë në furnizimin me litium në të ardhmen dhe në këtë mënyrë të avancojë tranzicionin energjetik.

Por në disa vende ka pasur rezistencë të popullatës ndaj projekteve të reja minerare, si për shembull në Serbi e në Austri gjatë viteve të fundit. Kjo shtron rrezikun që tranzicioni i planifikuar energjetik i BE-së mund të dështojë për shkak të këtyre pengesave.

Një ekspert i minierave në Universitetin e Minierave dhe Metalurgjisë në Leoben, Austri, tha se në dekadat e fundit, Evropa ka reduktuar minierat për arsye ekonomike dhe ua ka lënë vendeve ku procesi shkon më lirë. Këtu përfshihen Argjentina, Kili dhe Kina, të cilat së bashku prodhojnë më shumë se 95 për qind të litiumit në botë që nevojitet për të prodhuar makina elektrike dhe bateri.

E nxitur nga prodhimi i baterive dhe rritja e shitjeve të makinave elektrike, kërkesa globale për litium do të trefishohet nga 2017 në 2022, thonë të dhënat nga Agjencia Ndërkombëtare e Energjisë. Sipas burimeve të KE-së, pritet që kërkesa për litium në BE të rritet 12 herë deri në vitin 2030, që mund të çojë dhe në rritjen e çmimit të metalit.

Për shkak të tensioneve gjeopolitike që ndikojnë në tregjet globale të lëndëve të para, qëllimi i BE-së është që ta rikthejë procesin në Evropë dhe që kontinenti të jetë në gjendje të mbulojë në mënyrë të pavarur të paktën 10 për qind të konsumit vjetor të litiumit dhe të përpunojë 40 për qind në vitin 2030.

Deri në fund të dekadës, Bashkimi Evropian dëshiron të arrijë 15 për qind të nevojave për litium me anë të riciklimit, por efikasiteti i riciklimit aktualisht nuk është aq i lartë. Sipas ekspertëve, ende nuk ka një metodë të standardizuar të riciklimit sepse as bateritë nuk janë të standardizuara.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.