Vizitorët britanikë, tarifë për të hyrë në BE – Rregullat e reja, në fuqi nga maji i vitit të ardhshëm

Kristi Ceta/SCAN

 

Qytetarët e Mbretërisë së Bashkuar që do të udhëtojnë në BE verën e ardhshme do të duhet të paguajnë një tarifë prej 7 eurosh, pasi BE-ja zbuloi afatin kohor për futjen e kontrolleve të reja kufitare dhe kërkesat e hyrjes për disa vizitorë.

Komisioneri i BE-së për punët e brendshme, konfirmoi se Sistemi Evropian i Informacionit dhe Autorizimit të Udhëtimit (Etias), do t’u kërkojë qytetarëve të Mbretërisë së Bashkuar si dhe nga vende të tjera si SHBA, Australia dhe Kanadaja, të aplikojnë për pagesën e tarifës përpara se të hyjnë në vendet e bllokut. Vendimi pritet të hyjë në fuqi deri në maj 2025.

Etias do të kërkojë nga qytetarët e vendeve që nuk bëjnë pjesë në BE që të aplikojnë për autorizimin e udhëtimit prej 7 euro përpara se të hyjnë në zonën Shengen, e cila përfshin 27 shtete anëtare të BE-së, si dhe Islandën, Lihtenshtajnin, Norvegjinë dhe Zvicrën. Autorizimi do të zgjasë për tre vjet ose deri në skadimin e pasaportës suaj.

Kjo vjen pasi BE-ja konfirmoi se sistemi i saj i hyrjes dhe daljes për vendet Shengen do të nisë në 10 nëntor. Ky sistem do t’u kërkojë udhëtarëve informacion biometrik në kufi, si shenjat e gishtave dhe skanimet e fytyrës. Është pjesë e një përpjekjeje të BE-së për ta bërë më të vështirë për kriminelët ose terroristët që të hyjnë në bllok duke përdorur pasaporta false.

Qytetarët që duan të hyjnë në Bashkimin Evropian duhet të aplikojnë për një leje në internet dhe të dorëzojnë informacione personale si adresa, detajet e punësimit, si dhe informacionin e kontaktit kur janë në vendin e destinacionit. Pjesa më e madhe e aplikantëve do të miratohen brenda pak minutash, por disa vendime mund të zgjasin nga 48 deri në 72 orë.

BE-ja ka thënë se do të ketë një “periudhë kalimtare” gjashtëmujore pasi të hyjë në fuqi Etias, që do të thotë se ata që udhëtojnë nuk do të refuzohen automatikisht nëse nuk e kanë lejen e posaçme, por i plotësojnë kushtet e tjera të hyrjes.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.