Zbulohet diamanti 2.492 karat – Botsvana, lider global në këtë industri

Kristi Ceta/SCAN

 

Lucara Diamond Corp ka njoftuar gjetjen e një diamanti të rrallë 2.492 karat në minierën Karowe në Botsvanë. Ky zbulim i jashtëzakonshëm i një prej diamanteve më të mëdha të zbuluara ndonjëherë, u realizua nga teknologjia me rreze X e Kompanisë Mega Diamond Recovery, e instaluar në vitin 2017 për të identifikuar diamante me vlera të larta.

Gjetja e fundit i bashkohet një liste mbresëlënëse të diamanteve të kësaj miniere, duke përfshirë Sewelô 1.758 karat dhe Lesedi La Rona 1.109 karat.

William Lamb, President dhe CEO i Lucara, shprehu entuziazmin e tij për zbulimin e këtij diamanti të jashtëzakonshëm. Sipas tij, aftësia për të rikuperuar një gur kaq masiv, të paprekur, tregon efektivitetin ndaj gjetjes së diamanteve dhe angazhimin për të maksimizuar vlerën për aksionerët dhe palët e interesuara.

Industria e diamanteve të Botsvanës ofron përfitime të gjera socio-ekonomike për vendin. Ndikimi përfshin zhvillimin kombëtar duke financuar fusha kritike si arsimi dhe kujdesi shëndetësor.

Ky zbulim simbolizon ngjitjen e vazhdueshme të Botsvanës si një lider global në prodhimin e diamanteve. Ai përfaqëson jo vetëm pasurinë e madhe që gjendet në tokën e Botsvanës, por edhe përparimin e madh që kombi ka bërë në zhvillimin e kësaj industrie.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.