Zgjerimi i aktivitetit minerar – Hapet procedura konkurruese për 3 zona, fokusi te guri gëlqeror dhe ai dekorativ

Ola Mitre / SCAN

Ministria e Infrastrukturës dhe Energjisë ka shpallur ftesën për pjesëmarrje në procedurën konkurruese për 3 leje të reja minerare. Sipas publikimit 2 prej zonave minerare të nxjerra për interes përfshijnë nxjerrjen e gurit gëlqeror, ndërsa 1 gurin dekorativ.

Shfrytëzimi i gurit gëlqeror parashikohet të kryhet në objektin “Pashkashesh”, Qarku Tiranë dhe “Mali i Sherishtës”, në Selenicë. Ndërkohë që, zona e tretë për mineralin e gurit dekorativ, përfshin objektin “Radesh – Gradec”, në Skrapar.

Aplikimi për këto leje minerare bazohet në planin vjetor të vitit 2019. Ndërkohë që, përgjatë këtij viti parashikohet të nxirren për interes edhe zona të tjera minerare, bazuar në Planin për vitin 2024, që u miratua vetëm pak javë më parë.

Zhvillimi i aktivitetit minerar sipas këtij plani do të fokusohet në nxjerrjen e gurit gëlqeror, gurit dekorativ dhe ranor silicor. Dokumenti që orienton zhvillimin e sektorit për këtë vit parashikon hapjen e procedurave konkurruese apo zhvillimin e proceduarve të hapura për 20 zona minerare.

Sipas planit, 16 zona do të jepen për shfrytëzimin e mineraleve, ndërsa 4 zona të tjera janë për kërkim – zbulim.  Kështu, referuar dokumentit zyrtar këtë vit synohet të jepen 2 leje për kërkim – zbulimin e mineralit të bakrit, me vendndodhje në Vaun e Dejës dhe Tropojë dhe 2 leje të tjera për mineralin e kromit me vendndodhje në Pukë dhe Kukës.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.