15 shtete, presion BE-së për kufizimin e çmimit të gazit: “Ndihmon në menaxhimin e pritjeve inflacioniste”!

Një grup vendesh të Bashkimit Europian po e detyrojnë Brukselin që të përgatisë një plan këtë javë për një kufi në mbarë bllokun e shteteve për çmimin e gazit.

Me anë të një letre të nënshkruar nga ministrat e financave të shteteve përkatëse, kërkohet që propozimi i kufizimit të pasohet nga një propozim legjislativ sa më shpejt të jetë e mundur. Në letër thuhet se kriza energjetike, e cila filloi vjeshtën e kaluar, është përkeqësuar dhe po shkakton presione.

“Ne pranojmë përpjekjet e bëra nga Komisioni dhe masat që ka marrë për të përballuar krizën. Por ne ende duhet të trajtojmë problemin më serioz nga të gjithë: çmimin me shumicë të gazit natyror. Është e vetmja masë që do të ndihmojë çdo shtet anëtar të zbusë presionin inflacioniste, të menaxhojë pritshmëritë dhe të sigurojë një kornizë në rast të ndërprerjeve të mundshme të furnizimit dhe të kufizojë fitimet shtesë në sektor” thuhet në letër.

Më tej, 15 ministrat propozojnë që kufiri të zbatohet në të gjitha transaksionet e shitjes me shumicë të gazit natyror dhe të mos kufizohet vetëm në importet nga juridiksione specifike. Kjo mund të bëhet në një mënyrë që do të garantojë sigurinë e furnizimit dhe do arrijë qëllimin e përbashkët për uljen e kërkesës, thonë ata.  Por shtete si Danimarka, Gjermania dhe Holanda e kundërshtojnë letrën me arsyetimin se do të minojë sigurinë e furnizimit.

Komisioni deri më tani i ka kufizuar propozimet e tij në një taksë të papritur mbi fitimet e furnizuesve të gazit dhe kursimet e konsumit.

Bashkimi Europian duhet të vendosë një kufi të gjerë çmimi për të gjitha importet e gazit që hyjnë në bllok, në mënyrë që të vërë nën kontroll faturat në rritje të energjisë.

BE-ja propozoi një paketë masash emergjente për të trajtuar rritjen e çmimeve të energjisë në fillim të këtij muaji, por ka shmangur një kufi të çmimit të gazit, një ide që ka ndarë 27 vendet anëtare të bllokut.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.