Dollari, humbjet më të mëdha mujore në 1 vit Rezerva Federale mund të fillojë uljen e interesave në mars të 2024

Dollari amerikan e ka nisur në rënie të lehtë edhe javën e fundit të nëntorit dhe pritet të realizojnë humbjet më të mëdha mujore në thuajse një vit, ndërsa tregtarët po presin disa të dhëna ekonomike për të përcaktuar rrugën e ardhshme të normave të interesit në SHBA.

Takimi i shtyrë i OPEC+, publikimi i inflacionit nga Rezerva Federale dhe të dhënat mbi ecurinë e çmimeve konsumatore në Eurozonë dhe Australi do të plotësojnë kalendarin ekonomik të kësaj jave.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare është në rënie me rreth 0.2% dhe po qëndron në 103.2, niveli më i ulët në 2 muaj e gjysmë. Gjatë këtij muaji, ndërkohë, ky indeks ka humbur më shumë se 3% të vlerës, performanca më e dobët në rreth 1 vit.

Tregtarët, të kthyer nga qetësia e Ditës së Falënderimeve në fund të javës së kaluar, besojnë se normat e interesit në SHBA kanë arritur kulmin dhe shumë shpejt do të fillojë ulja e tyre. Megjithatë, për shkak se inflacioni në vendet e G10-ës është mbi objektivin e bankave qendrore, politikëbërësit kanë vijuar me narrativën se normat e interesit do të qëndrojnë të larta për një kohë më të gjatë.

Analistët vlerësojnë 23% mundësi që Rezerva Federale të ulë normën bazë të interesit në takimin e marsit dhe 60% mundësi për takimin e majit. Ndërkohë, paundi britanik po tregtohet në mbi 1.26 dollarë, niveli më i lartë në 2 muajt e fundit, duke zgjeruar fitimet e javës së kaluar pasi të dhënat treguan se kompanitë britanike raportuan rritje të fitimit gjatë nëntorit, pas tre muajsh tkurrje. Paundi është rritur me 3.8% gjatë nëntorit, përballë dollarit amerikan, fitimet më të mëdha që nga nëntori i kaluar, kur rritej me 5%.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.