SHBA bëhet partneri më i madh tregtar i Gjermanisë – Pas shumë vitesh zëvendëson Kinën. Bizneset ndryshojnë strategji

Pas vitesh me radhë ku Kina ka qenë partneri kryesor tregtar i Gjermanisë, tashmë  SHBA duket sikur po zënë në heshtje atë vend. Eksportet dhe importet e kombinuara midis Gjermanisë dhe SHBA-së arritën në 63 miliardë euro midis janarit dhe marsit 2024. Ndërkohë, tregtia midis Gjermanisë dhe Kinës arriti në rreth 60 miliardë euro.

Kina ka qenë partneri më i madh tregtar i Gjermanisë për shumë vite, por hendeku midis Kinës dhe SHBA-së është ngushtuar vitet e fundit. SHBA ka qenë gjithashtu prej kohësh një treg më i madh për eksportet gjermane sesa Kina.

Sipas analistëve, ekonomia kineze po “zvarritet” dhe kompanitë gjermane po përballen me konkurrencë më të ashpër nga firmat kineze të subvencionuara. Dallimi kryesor është se tani edhe SHBA-të po bëhen më të rëndësishme sidomos për importet.

Gjermania ka ndjekur një strategji të re për Kinën, duke u bërë thirrje kompanive që t’i largohen rrezikut. Por, sipas qeverisë gjermane, Kina do të mbetet një partner për vendit dhe nuk duhet të ketë një ndarje. Ndërkohë, që “rivaliteti sistemik” ka karakterizuar gjithnjë e më shumë marrëdhëniet mes dy vendeve.

Tensionet janë rritur gjithashtu midis Bashkimit Evropian dhe Kinës, që kanë nisur hetime për praktikat tregtare reciproke dhe kërcënuar se do të vendosin tarifa për importet.

Muajin e kaluar, një studim nga instituti ekonomik gjerman Ifo tregoi se numri i kompanive që thonë se janë të varura nga Kina ra nga 46% në shkurt të vitit 2022 në 37% në shkurt të 2024. Kjo lidhej me më pak kompani prodhuese që mbështeteshin në lëndët e para kineze.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.