Nis prodhimin centrali diellor i Karavastasë – Shifrat/ Energjia e gjeneruar për 3-mujorin. Kapaciteti total i instaluar arrin në 193 MW

Centrali diellor i Karavastasë ka hyrë në prodhim, teksa Enti Rregullator i Energjisë ka raportuar shifrat për sasinë e energjisë së gjeneruar përgjatë 3 muajve të parë të këtij viti. Sipas të dhënave, për periudhën janar – mars, impianti ka prodhuar në total 45,400 mWh energji, duke shënuar një rritje të energjisë së gjeneruar nga dielli në vendin tonë.

Parku fotovoltaik i Karavastasë ka një fuqi të instaluar prej 140 MW dhe është impianti i parë i madh diellor që hyn në prodhim, duke bërë që kapaciteti total i instaluar të arrijë në 193 MW. Deri më tani, në funksion kanë qenë 19 impiante të vegjël, me kapacitet nga 2 MW, një impiant 10 MW, si dhe impianti që ndodhet në digën e Qyrsaqit e që zotërohet nga KESH, që ka një fuqi prej 5.143 MW.

Ndërkaq, marrëveshja e nënshkruar mes shtetit shqiptar dhe kompanisë Voltalia që zotëron centralin e Karavastasë, parashikon blerjen e gjysmës së energjisë së gjeneruar me një çmim fiks prej 24.89 euro/mWh. Ky parashikim kontraktual do të jetë në fuqi për 15 vjet, ndërkohë që sasia tjetër e energjisë së prodhuar tregtohet nga kompania franceze në treg të lirë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.