Rishtypja e monedhave, cilat prerje do të emetohen? – 28 maj 2024, hidhet në qarkullim monedha e re 10 lekëshe

Banka e Shqipërisë njofton se duke filluar nga data 28 maj i këtij viti do të hidhen në qarkullim monedhat metalike me vlerë nominale 10 lekë, me kurs ligjor, emetim i vitit 2023. Këto monedha kanë të njëjtën përbërje, pamje, përmasa dhe peshë me emetimin e fundit të kësaj prerjeje.

Ndryshimi nga emetimi i fundit qëndron tek viti i emetimit i shtypur në trupin e monedhës metalike, i cili në monedhat e reja do të jetë “2023”. Pas rreth dy javësh këto monedha do të përdoren si mjet pagese paralelisht me të gjitha monedhat metalike ekzistuese në qarkullim të kësaj prerjeje, emetime të viteve të mëparshme.

Të dhënat e Bankës së Shqipërisë tregojnë se vlera e monedhave kombëtare në qarkullim, në fund të vitit 2023, arriti në 408 miliardë lekë, ose 6.8 miliardë lekë më shumë se një vit më parë.

Hedhja në qarkullim i monedhës kombëtare “lek” është detyrë ekskluzive e Bankës së Shqipërisë. Ajo përcakton format, peshat, masat, modelin dhe karakteristikat e tjera të kartëmonedhave dhe monedhave metalike shqiptare, me kurs ligjor brenda vendit.

Rishtypja e monedhave metalike në vend realizohet për shkaqe të ndryshme, siç mund të jenë nevojat ekonomike, mungesa e këtyre monedhave, apo edhe inflacioni pasi në situata të inflacionit, monedhat metalike preferohen si një mënyrë për të ruajtur vlerën e parave për shkak se materialet prej të cilave janë bërë (si metali) janë më të qëndrueshme sesa kartëmonedhat në kushte të tilla.

Armela Duka/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.