Bizneset e huaja “lëngojnë” për fuqi punëtore – Anketimi/ Cilat janë shqetësimet më të mëdha të sipërmarrjeve gjermane?

Mungesa e fuqisë punëtore, kostot e punës si dhe luhatjet e kursit të këmbimit vijojnë në mbeten shqetësimet kryesore për bizneset gjermane në vend si dhe faktorët më me rrezik për zhvillimin e kompanive të tyre.

Megjithatë, në anketimin vjetor mbi klimën e biznesit, të Shoqatës Gjermane të Industrisë dhe Tregtisë (DIHA), situata aktuale ekonomike konsiderohet në rritje nga viti i kaluar, ku 45 %  e të anketuarve e konsiderojnë të kënaqshme, 22% të mirë dhe 33% e vlerësojnë atë negativisht.

“Për të rritur atraksionin e Shqipërisë si vend për investime ekonomike nga Gjermania, nevojiten përpjekje të vazhdueshme nga të gjitha palët në krijimin e një klime pozitive si dhe sigurimi i një fushe loje të barabartë për investitorët.  Për ne është e qartë, sipërmarrja dhe investimet mund të begatojnë vetëm atje ku krahas çmimeve të volitshme ka edhe një kuadër të mirë ligjor dhe një administratë transparente dhe me integritet. Mbështesim hapat e Shqipërisë në drejtim të konsolidimit ligjor dhe luftës kundër korrupsionit.

Ndër faktorët që bizneset gjermane vlerësojnë më negativisht në Shqipëri janë transparenca e tenderëve publikë; lufta kundër kriminalitetit dhe korrupsionit, parashikueshmëria e politikave ekonomike dhe siguria ligjore.

Ndërsa ndër faktorët që vlerësohen pozitivisht janë infrastruktura, disponueshmëria dhe cilësia e furnitorëve lokalë, negociatat për anëtarësim në BE , arsimi akademik dhe fleksibiliteti në të drejtën e punës.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.