Nis procedura për nëndrejtor ekzekutiv të AMF – Kandidatët duhet të dorëzojnë dokumentet deri më 27.05.2024

Ministria e Financave ka nisur procedurat për përzgjedhjen e një anëtar të Bordit të Autoritetit të Mbikëqyrjes Financiare (AMF), që do të mbajë edhe funksionin e nëndrejtorit ekzekutiv.

Ndër kriteret që duhen plotësuar janë të ketë kryer arsimin e lartë ekonomik, juridik, ose të lidhur me shkencën e aktuarëve.

Gjithashtu, kandidati duket të ketë përvojë pune 7-vjeçare, nga e cila të paktën 5 vjet në njërën nga këto fusha ose disa prej tyre të marra sëbashku: Financë-kontabilitet; Administrim i shoqërive tregtare; Këshillim ligjor i shoqërive tregtare; Hartim legjislacioni; Shkencë e aktuarëve; Sigurime shoqërore dhe pensione. Afati i dorëzimit të aplikimit dhe dokumenteve është deri më datë 27.05.2024, ora 14:00. Sipas procedurës dhe përcaktimeve ligjore, kandidati i përzgjedhur do t’i propozohet nga Ministri i Financave, Kuvendit të Republikës së Shqipërisë, për emërim.

Bordi i Autoritetit të Mbikëqyrjes Financiare është organi më i lartë drejtues dhe vendimmarrës. Bordi është një organ kolegjial i përbërë nga 5 anëtarë, dy prej të cilëve, Drejtori i Përgjithshëm Ekzekutiv dhe Nëndrejtori Ekzekutiv janë anëtarë ekzekutivë me kohë të plotë, ndërsa Kryetari dhe dy anëtarë të tjerë janë anëtarë joekzekutivë.

Mandati i çdo anëtari Bordi është 5 vjet. Anëtarët e Bordit emërohen nga Kuvendi i Republikës së Shqipërisë sipas një procedure të përcaktuar në ligj.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.