Rritet numri i super të pasurve në botë – Kryeson Bernard Arnault me 222 miliardë dollarë

“Klubi” i super të pasurve në botë tani ka 15 anëtarë me pasuri mbi 100 miliardë dollarë, duke vazhduar të thyejnë rekorde, pasi tejkalojnë valët e inteligjencës artificiale, mallrave luksoze dhe ndryshimeve gjeopolitike.

Vlera neto e kombinuar për këta njerëz është rritur me 13 për qind këtë vit, përkthyer në shifra te tjera, në 2.2 trilion dollarë, sipas Indeksit të Miliarderëve të Bloomberg. Kjo e dhënë mposht ritmin e inflacionit dhe tregun më të gjerë të aksioneve. Mes tyre, ata mbajnë gati një të katërtën e pasurisë së 500 njerëzve më të pasur në botë. Ndërsa të 15-tët kanë kaluar 100 miliardë dollarë, kjo është hera e parë që të gjithë ata kanë arritur të kenë pasuri të atij niveli në të njëjtën kohë.

Trashëgimtarja e “L’Oreal”, Francoise Bettencourt Meyers, themeluesi i Dell Technologies, Michael Dell dhe miliarderi meksikan Carlos Slim, të gjithë fillimisht arritën pragun në pesë muajt e fundit dhe disa janë luhatur rreth atij niveli, duke e kaluar atë disa herë.

Bettencourt Meyers ishte gruaja e parë që arriti një pasuri me 12 shifra në dhjetor, pasi aksionet e kompanisë së kozmetikës luksoze shënuan vitin e tyre më të mirë që nga viti 1998. Meyers, 70 vjeç, renditet e 14-ta në indeks me një vlerë neto prej 101 miliardë dollarë.

Dell, 59 vjeç, kohët e fundit gjithashtu arriti të kishte në pasurinë e tij 100 miliardë dollarë, pasi kërkesa për pajisje të lidhura me AI rriti çmimin e aksioneve të Dell Technologies në nivele rekord. Ai tani është i 11-ti në indeksin e pasurisë së Bloomberg me një pasuri prej 113 miliardë dollarësh.

Anëtarë të tjerë të rinj në këtë grup përfshijnë Slim, 84 vjeç, i cili renditet i 13-ti me 106 miliardë dollarë. Personi më i pasur në Amerikën Latine shtoi rreth 28 miliardë dollarë në vlerën e tij neto në vitin 2023.

Kryesuesi i supermiliarderëve është themeluesi dhe shefi ekzekutiv i LVMH, Bernard Arnault, 75 vjeç, me një vlerë neto prej 222 miliardë dollarësh. Themeluesi i Amazon, Jeff Bezos, 60 vjeç, renditet i dyti me një vlerë neto prej 208 miliardë dollarësh.

Sakaq, CEO i Tesla, Elon Musk, 52 vjeç, ka një vlerë neto prej 187 miliardë dollarësh dhe renditet i treti në indeks. Pasuria e tij, e cila ka rënë me më shumë se 40 miliardë dollarë këtë vit, përbëhet kryesisht nga aksionet në prodhuesin më të vlefshëm të makinave në botë.

Adelina Onuzi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.