Ulje taksash për të ndaluar emigrimin e të rinjve – Qeveria e Portugalisë miraton pr/ligjin. Përfitojnë mbi 300 mijë persona

Qeveria e qendrës së djathtë në Portugali miratoi një reduktim të mprehtë të taksës mbi të ardhurat për më shumë se 300,000 persona të moshës 18-35 vjeç, duke ulur me dy të tretat normën mesatare që ata do të paguajnë nga viti i ardhshëm në përpjekje për të parandaluar emigrimin e të rinjve.

Kryeministri Luis Montegero tha se shumica dërrmuese do të paguajë diku midis 4.4% dhe 8%, ndërsa norma maksimale për të gjithë të rinjtë që fitojnë deri në 5800 euro në muaj do të jetë 15%. Aktualisht, normat e tatimit mbi të ardhurat ndryshojnë midis 13% dhe 48% në grupet e pagave.

Masa duhet të miratohet nga parlamenti, ku koalicioni qeverisës i qendrës së djathtë që erdhi në pushtet pas zgjedhjeve të përgjithshme të 10 marsit nuk ka shumicën, por pjesa më e madhe e partive opozitare kanë bërë thirrje për shkurtime të tilla taksash, të cilat duhet të lehtësojnë miratimin e tij. Montenegro tha se kjo ulje e taksave do t’i kushtojë arkës së shtetit rreth 1 miliard euro në vit.

Sipas Observatorit të Emigracionit, rreth 850,000 të rinj, ose 30% e atyre të moshës 15 deri në 39 vjeç, janë larguar nga vendi – një nga më të varfërit e Evropës Perëndimore dhe aktualisht jetojnë jashtë, për shkak të kushteve të këqija të punës dhe pagave të ulëta.

Qeveria gjithashtu do t’u japë të rinjve një garanci publike, e cila mund të mbulojë deri në 15% të kredive për banesa me vlerë deri në 450,000 euro, pasi shumë prej tyre nuk kanë kursime të mjaftueshme për të bërë një pagesë fillestare të kërkuar nga bankat dhe për t’i përjashtuar ata nga taksat vendore.

Qeveria kishte njoftuar më parë ulje të tatimit mbi të ardhurat për klasën e mesme me vlerë 1.5 miliardë euro krahasuar me nivelet e vitit 2023.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.