Rekord i ri aksidentesh rrugore në 5 muajt e parë të vitit – 199 aksidente më shumë se vitin e kaluar, por 13% më pak vdekje

Ledina Elezi/SCAN

Në 5 muajt e parë të këtij viti numërohen gjithsej 626 aksidente, rreth 199 më shumë se në periudhën janar-maj 2023. Pavarësisht numrit të lartë të aksidenteve, shkalla e vdekshmërisë rezulton të jetë ulur, ku nga 16,9 vdekje për 100 aksidente që u regjistruan vitin e kaluar, këtë vit kemi vetëm 10,1 vdekje për 100 aksidente.

Sipas të dhënave më të fundit nga INSTAT, në muajin maj janë regjistruar 126 aksidente rrugore me 167 persona të aksidentuar në total. Numri më i lartë i aksidenteve rrugore ka ndodhur përgjatë ditëve të enjte dhe të shtunë, ndërsa më pak në ditën e dielë. Pjesa më e madhe e aksidenteve rrugore kanë ndodhur përgjatë harkut kohor 19:00-24:00, duke zënë 20% të numrit të aksidenteve rrugore gjithsej.

Në 5 muajt e parë të 2024-ës janë regjistruar vetëm 63 viktima, rreth 13% më pak se në të njëjtën periudhë të një viti më parë. Në përafërsisht 87% të rasteve, shkak i aksidenteve rrugore ka qenë sjellja e drejtuesit të mjetit. Ndërkohë që numri më i lartë i aksidenteve është kryer nga persona të moshës 25 deri në 34 vjeç, duke zënë 29% të numrit të aksidenteve gjithsej.

Por cilat janë qarqet që kanë regjistruar numrin më të madh të aksidenteve?

Për shkak të numrit më të madh të popullsisë dhe lëvizjeve, në krye të listës qëndron qarku i Tiranës me 250 aksidente gjithsej. Direkt më pas vjen Durrësi me 72, Lezha me 56 dhe Fieri me 42. Qarqet që kanë shënuar numër më të vogël aksidentesh janë Berati, Shkodra dhe Korça.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.