Për çfarë u përdor huaja bankare? – Rekord financimi për individët dhe bizneset në qershor

Armela Duka/SCAN

 

Kredia e re për muajin qershor, fiksohet pranë 31 miliardë lekëve, ose rreth 309 milionë euro. Qershori është një prej muajve që historikisht është karakterizuar nga një kërkesë e lartë për financim. Nëse analizojmë historikun e kredisë së re nga qershori i vitit 2016, konstatojmë se qershori i vitit aktual ka siguruar rekord pasi është 48.7% më i lartë se 8 vite më parë. Shifrat zyrtare nga Banka e Shqipërisë të analizuara dhe përpunuara nga “Scan Intel” konfirmojnë edhe njëherë rolin e sektorit bankar në mbarëvajtjen e ekonomisë gjatë kësaj periudhe.

Rritja e ndjeshme e kreditimit gjatë qershorit në terma mujorë nuk ka qenë e njëjtë si për bizneset, ashtu edhe për individët. Gjatë këtij muaji janë dhënë nga bankat 22.2 miliardë lekë hua për bizneset dhe 8.8 miliardë lekë për individët.

Por për çfarë u përdor huaja nga individët? Kredia për blerje banesash duket se vazhdon të udhëheqë tendencën. Përkatësisht 49% e kredisë së marrë investohet në blerjen e pasurive të paluajtshme. Shifrat tregojnë se kryesisht individët kanë preferuar që kryesisht huanë ta marrin në monedhën vendase. Konkretisht, nga 8.8 miliardë lekë, huaja e marrë në lekë rezulton të jetë afro 6.9 miliardë, ndërsa në euro, afro 1.8 miliardë lekë.

Edhe pse vërehet një rënie e vogël e vrullit të muajve të mëparshëm, kryesisht efekt sezonal, kredia e re për blerje banese këtë qershor regjistron gjithashtu një rekord të ri, si në euro, ashtu edhe në lekë. Lidhur me qëllimet e tjera të përdorimit të huasë vëmë re se një pjesë e konsiderueshme e saj është përdorur për mallra jo të qëndrueshëm, dhe më pak për mallra të qëndrueshëm.

Nga ana tjetër, bizneset shpenzuan më shumë për blerje pajisjesh dhe pasuri të paluajtshme. Vlera e përdorur për këto kategori arrin në afro 2 miliardë lekë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.