Sa mallra u transportuan përmes detit? – Koksi dhe produktet e rafinuara të naftës zënë shumicën e volumit
Ledina Elezi/SCAN
Volumi i mallrave të tregtuara me det, duke përfshirë mallrat e eksportuara dhe të importuara, arriti në 1.546,3 mijë ton në tremujorin e dytë të këtij viti, tregues ky që është rritur me përafërsisht 16% krahasuar me të njëjtën periudhë të vitit 2023. Konkretisht, volumi i mallrave të eksportuara me det zë 40,6% ndaj totalit të volumit gjithsej të mallrave të eksportuara. Ndërsa, mallrat e importuara zunë pothuajse 65% ndaj gjithë totalit të volumit të mallrave të importuar në tremujorin e dytë të vitit.
Porti i Durrësit, Vlorës, Shëngjinit dhe porti i Limjonit në Sarandë, janë katër portet detare të cilët shërbejnë për transport mallrash. Vetëm nga Porti i Durrësit, i cili konsiderohet porti kryesor në vend, janë transportuar gati 95% e volumit të mallrave të transportuar me det gjatë tremujorit të dytë 2024, ose 2.034 mijë ton mallra, volum që është rritur me 26,5%, vlerësuar me të njëjtën periudhë të një viti më parë.
Po cilat janë llojet kryesore të mallrave të transportuara përmes rrugëve detare?
Referuar të dhënave zyrtare nga INSTAT, rreth 17% e mallrave të transportuara nga portet ishin koksi dhe produktet e rafinuara të naftës. Ndërkohë, grupi “Produkte të tjera minerale (jo metalike)” përbën 14,2% të mallrave të transportuara. Metalet bazë, produktet metalike të fabrikuara, përveç makinerive dhe pajisjeve, zënë 11,2 % të totalit, ndërsa grupi i mallrave “Qymyr dhe linjit, naftë bruto dhe gaz natyror” përbën vetëm 9% të mallrave të transportuar.
Së fundmi është hapur edhe gara ndërkombëtare për portin e ri tregtar në Porto Romano, i cili pritet ta kthejë Shqipërinë në një pikë strategjike për tregtinë dhe sigurinë në të gjithë rajonin, duke nxitur flukse të reja tregtare dhe shkëmbimesh.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.