Miratohet projektligji për produkte organike shqiptare – Denaj: Rregullon certifikimin dhe kontrollin në çdo fazë të prodhimit
Diamila Leka/ Scan
Këshilli i Ministrave miratoi projektligjin për produkte organike shqiptare. Ministrja e Bujqësisë Anila Denaj theksoi se ky projektligj organizon rregullat e qartë për produktet organike, të cilat synohet që të vendosen në tregun shqiptar në bazë të standardeve të BE.
Miratuam projektligjin i cili organizon rregullat e qartë për produktet organike, të cilat do të përgatiten dhe synohet të vendosen në tregun shqiptar sipas standardeve të BE. Rregullohen parimet për certifikimin e operatorëve organik, përdoruesin e treguesve me etikë dhe reklamimin, rregullat e kontrollit zyrtar në çdo fazë të prodhimit, ruajtjes, shpërndarjes, import-eksport. Përveç autoritetit që do kenë në përgjegjësi kontrollin, ligji siguron miratimin e listës së produkteve për mbrojtjen e bimëve dhe produktet plehëruese në bujqësinë organike dhe publikimin e listës. Ngritje sistemi elektronik që do menaxhohet nga ministria.
Denaj theksoi se projektligji do të miratohet në parlament brenda këtij viti dhe se pritet zbatimi i tij vitin e ardhshëm.
Projektligji është pjesë e akteve të parashikuara këtë vit dhe përafron rregulloren e BE të datës 30 maj. Rregullorja ka hyrë në fuqi në 2022, por miratimi i këtij ligji fillon zbatimin nga viti i ardhshëm dhe synojmë miratimin në parlament brenda këtij viti.
Më tej, Denaj njoftoi miratimin e një projektvendimi që mundëson deri në 25 milionë euro për financimin e ekonomisë blu.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.