Sateliti i parë për identifikimin e metanit – Kompania planifikon të gjurmojë deri në 90% të rrjedhjeve të gazit

Kristi Ceta/ SCAN

 

Një koalicion që përdor teknologjinë e zhvilluar nga NASA dhe i mbështetur nga burime të tjera, përfshirë ish-kryebashkiakun e Nju Jorkut, Mike Bloomberg, do të lëshojë satelitë në hapësirë për të identifikuar rrjedhjet e gazit metan që ngroh planetin.

Nisja e satelitit të parë, në bordin e misionit SpaceX Transporter-11 Rideshare, është një moment historik për Koalicionin Carbon Mapper, i cili u formua në vitin 2021.

Sateliti, i quajtur Tanager-1, do të jetë në gjendje të dallojë rrjedhjet e metanit nga objektet individuale si rafineritë e naftës dhe tokat e mbetjeve. Teknologjia ka për qëllim të ndihmojë industritë ndotëse për të gjetur dhe mbyllur rrjedhjet, dhe të dhënat do të jenë të disponueshme përmes një portali publik në internet.

Carbon Mapper planifikon të lëshojë satelitë të tjerë që, të kombinuar, do të jenë në gjendje të gjurmojnë deri në 90% të shtëllungave të mëdha të metanit në botë çdo ditë.

Shkencëtarët thonë se identifikimi i burimeve të metanit është thelbësor për të bërë shkurtimet drastike të emetimeve të nevojshme për të shmangur ndikimet më të këqija të ndryshimeve klimatike.

Metani është mbi 80 herë më i fuqishëm se dioksidi i karbonit në 20 vitet e para të tij në atmosferë. “Super-emetuesit”, ose burimet që emetojnë më shumë se 100 kilogramë metan në orë, kontribuojnë 20% deri në 60% të emetimeve totale të një rajoni në disa sektorë, tha shefi ekzekutiv i Carbon Mapper.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.