Transporti i mbetjeve të rrezikshme – Balluku: Porti i Durrësit s’ka lidhje me procesin, shërbimi kryhet nga koncesionari

Ola Mitre / SCAN

 

“Porti i Durrësit nuk ka përgjegjësi në drejtim të transportit të mbetjeve të rrezikshme”. Deklarata u bë nga ministrja e Infrastrukutrës dhe Energjisë, Belinda Balluku, e cila në daljen pas mbledhjes së qeverisë komentoi skandalin e transportit ndërkombëtar të mbetjeve të rrezikshme, të gjeneruara nga kompania “Kurum”.

“Regjimi i përkohshëm i transportit të mbetjeve të rrezikshme në Republikën e Shqipërisë ka filluar në vitin 1998. Ka qenë një procedurë normale deri ditën që ka marrë këtë përmasë mediatike, sigurisht nga anëtarët e Konventës së Bazelit. Por, ajo çka është më e rëndësishme për t’u thënë është që Autoriteti Portual Durrës sigurisht që nuk ka asnjë lidhje me këtë proces, duke qenë se të gjithë jeni në dijeni, që janë procesuar nga një nga koncesionarët evropianë, që operojnë në Portin e Durrësit. Autoriteti Portual i Durrësit, me koncesionarin që ka kryer të gjithë këto transporte janë 2 entitete konkurrente”, – tha Balluku.

Ndërkaq, Balluku foli edhe për situatën e krijuar me 500 punonjësit e “Kurum”.

“Ka ndodhur vetëm para 2 ditësh. Ne jemi duke e analizuar situatën. Ka patur një njoftim të Kurum, ditë përpara për të thënë të drejtën, pranë Bashkisë së Elbasanit për një vështirësi përsa i përket operimeve. Por, ju e dini shumë mirë që qeveria shqiptare nuk është hera e parë që ka konflikte me kompaninë Kurum, të cilat janë ndjekur edhe juridikisht. Kështu që, ne do të vazhdojmë ta monitorojmë situatën. Kurum-i do jetë i detyruar që të japë shpjegimet e duhura. Kjo është një çështje sociale, pra tejkalon çështjet tregtare që mund të lidhen me marrëveshjet që Kurum ka me Bashkinë e Elbasanit apo edhe me Ministrinë e Infrastrukturës dhe Energjisë”, – tha Balluku.

Alarmi për transportin e mbetjeve të dyshuara toksike nga Shqipëria, me destinacion Tajlandën u ngrit nga Basel Action Netëork (BAN), një organizatë mjedisore me qendër në Shtetet e Bashkuara të Amerikës. Ndërkohë që, do të jetë hetimi i nisur nga prokuroria shqiptare dhe institucioneve ndërkombëtare, siç është OLAF, që do të ekspozojnë përgjegjësit e shkeljes së Konventës së Bazelit.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.