Kina redukton termocentralet e qymyrit me 80% – Pekini kryeson botën për impiantet e energjisë së rinovueshme
Kristi Ceta/SCAN
Kina, ndërtuesi më i madh në botë i termocentraleve me qymyr, shkurtoi numrin e lejeve për impiantet e reja me gati 80% në gjysmën e parë të 2024, zbulon raporti i grupit mjedisor Greenpeace.
Ky raport zbuloi gjithashtu se kapaciteti i kombinuar i energjisë së erës dhe diellit në Kinë prej 11.8 teravat (TW) tejkaloi kapacitetin e qymyrit (11.7 TW) për herë të parë në gjysmën e parë të vitit. Në të njëjtën kohë, Kina dha leje për 14 termocentrale qymyri me një kapacitet total gjenerues prej 10.3 gigavat (GW), një rënie prej 79.3% nga gjashtë muajt e parë të 2023.
Për krahasim, e gjithë Evropa shtoi 58 gigavat kapacitet në vitin 2023, një rritje prej 40 për qind nga viti 2022.
Kina kryeson botën në instalimet e energjisë së rinovueshme, por qeveria ka thënë se impiantet e qymyrit janë ende të nevojshme në periudhat kur kërkesa është në pikun e vet, sepse energjia e erës dhe diellit janë më pak të besueshme.
Ndërsa rrjeti i Kinës u jep përparësi burimeve më të gjelbra të energjisë, ekspertët shqetësohen se nuk do të jetë e lehtë për Pekinin të heqë dorë nga qymyri.
Qeveria ka nxjerrë një sërë dokumentesh në muajt e fundit mbi reduktimin e emetimeve të karbonit dhe përshpejtimin e kalimit drejt energjisë së rinovueshme. Në qershor, Administrata Kombëtare e Energjisë zbuloi një plan tre-vjeçar për të rinovuar njësitë ekzistuese të energjisë me qymyr dhe për t’i pajisur objektet e sapondërtuara me teknologji me karbon të ulët.
Kina po hedh sytë gjithashtu tek energjia bërthamore, pasi kërkon të përmbushë objektivat për reduktimin e karbonit. Kohët e fundit, Këshilli i Shtetit miratoi pesë projekte të energjisë bërthamore me 11 njësi dhe një kosto totale prej 200 miliardë juanësh (25 miliardë euro).
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.