3.3 mld euro për dekarbonizimin e industrisë – Berlini synon t’i çojë në zero emetimet e karbonit në 2045

Kristi Ceta/SCAN 

 

Qeveria gjermane po investon 3.3 miliardë euro për dekarbonizimin e industrisë. Shuma e mësipërme do të financojë projekte për ta bërë industrinë më intensive të karbonit më miqësore me klimën, duke përfshirë groposjen e karbonit nën tokë.

Gjermania, shtëpia e ekonomisë më të madhe të Evropës dhe e shumë industrive me energji intensive, synon të ulë emetimet e saj në zero deri në vitin 2045.

Qeveria njoftoi në shkurt se planifikon të lejojë që karboni të ruhet nën tokë në vende larg qytetërimit. Në atë kohë u theksua se strategjia e menaxhimit të karbonit duhej ende të shndërrohej në legjislacion të detajuar.

Kundërshtarët pohojnë se e ashtuquajtura kapje dhe ruajtje e karbonit është e paprovuar në shkallë më të gjerë dhe ka qenë më pak efektive se alternativat si energjia diellore dhe e erës në dekarbonizimin e sektorit të energjisë.

Ministria e Ekonomisë në Gjermani planifikon të nisë programin muajin e ardhshëm. Kompanitë do të kenë tre muaj kohë për të paraqitur projektet e tyre mbështetëse. Plani pritet të zgjasë deri në vitin 2030, me tender vjetor.

Qeveria gjithashtu ka nisur një program, që synon të ndryshojë metodat e prodhimit, duke i bërë më miqësore me mjedisin dhe klimën.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.