2 mld lekë shtesë për ujësjellësit – Fondi, për projektet me financim të huaj dhe detyrime të prapambetura

Ola Mitre / SCAN

 

Buxheti për sektorin e ujësjellës – kanalizime do të rritet me 2 mld lekë, pas rishikimit të të ardhurave të miratuara në mbledhjen e fundit të qeverisë. Ndërkohë që, kjo rritje e buxhetit ka ardhur pas kërkesës së bërë nga Ministria e Infratsrukturës dhe Energjisë, mbështetur në analizën e performancës së zbatimit të projekteve në vazhdim dhe ecurisë së projekteve të reja prioritare 2024, që kanë qenë apo janë në procedurë prokurimi.

Kërkesa për rritjen e buxhetit u paralajmërua në raportin e monitorimit të buxhetit për 4 – mujorin e patë të këtij viti, që hartohet nga MIE ku theksohej se nga njësitë e varësisë janë raportuar kërkesa buxhetore shtesë, si rezultat i krijmit rishtazi të detyrimeve të prapambetura për periudhën raportuese dhe parashikimit për shmangien e krijimit të detyrimeve të mëtejshme gjatë periudhave të mëvonshme 2024.

Po ashtu, ministria detajonte se nivel programi dhe në nivel artikulli do të kërkoheshin rreth 2.17 mld lekë lekë për detyrime të prapambetura të krijuara rishtazi sipas autoriteteve kontraktore për projekte të përfunduara dhe me fatura të dorëzuara në 4 – mujorin e parë 2024, si dhe rreth 1,21 mld lekë për projektet me financim të huaj. Në total kërkesa për buxhet shtesë për sektorin e ujësjellës kanalizimeve ishte rreth 3.38 mld lekë. Investimet në ujësjellës dhe kanalizime zënë peshën e dytë kryesore të shpenzimeve kapitale në buxhetin e Ministrisë së Infrastruktrës dhe Energjisë, me 21.1% të totalit.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.