Cili është sektori më i cenueshëm për financimin e terrorizmit? – OJF-të, me rrezik më të lartë për të rënë “pre” e organizatave terroriste

Ledina Elezi/SCAN

 

Sipas Task Forcës së Veprimit Financiar (FATF) dhe Komitetit MONEYVAL të Këshillit të Evropës, organizatat që janë të angazhuara në mbledhje ose shpërndarje fondesh për qëllime bamirësie, fetare, kulturore, arsimore, sociale ose vëllazërie, apo për kryerjen e llojeve të tjera të veprimtarisë që klasifikohen në ‘punët e mira’, përbëjnë një rrezik potencial ekspozimi ndaj abuzimit apo keqpërdorimit nga financimi i terrorizmit.

Për këtë arsye, Agjencia e Inteligjencës Financiare ka publikuar për konsultim publik një udhëzues që synon t’u sigurojë OJF-ve informacion ndihmues për parandalimin e përfshirjes në financimin e terrorizmit.

Rekomandimi 8 i FATF është ai i cili përcakton mekanizma për sektorin e OJF-ve dhe ka për qëllim të sigurojë që OJF-të të mos abuzohen nga terroristët, por gjithashtu që organizatat terroriste të mos shfaqen si subjekte të ligjshme, të shfrytëzojnë subjektet e ligjshme si kanale për financimin e terrorizmit, duke përfshirë këtu edhe shmangien e masave për ngrirjen e aseteve, ose për të fshehur dhe devijuar fondet e destinuara për qëllime të ligjshme në qëllime terroriste.

Task Forca e Veprimit Financiar FATF përcakton se vendet duhet të kenë mekanizmat e duhura si vlerësime risku, masa të bazuara në risk e të tjera, për mbrojtjen e OJF-ve nga keqpërdorimi ose abuzimi i financimit të terrorizmit. Gjithashtu FATF këshillon vendet që OJF-të të kenë masa vetërregulluese dhe masat e kontrollit të brendshëm, si dhe të përdorin sisteme financiare formale për transferimin e fondeve.

Bazuar në këtë rekomandim, masat për zvogëlimin ose uljen e riskut të keqpërdorimit të OJF-ve nga financimi i terrorizmit merren kryesisht nga organet përgjegjëse qeveritare. Megjithatë, praktikat më të mira ndërkombëtare duke përfshirë edhe FATF evidentojnë se është po aq e rëndësishme edhe marrja e masave nga vetë OJF-të. Disa prej masave të cilat ndihmojnë OJF-të në uljen e riskut dhe cenueshmërisë janë përdorimi i kanaleve të sigurta të pagesës, njohja e palëve të treta, monitorimi i programit, njohja e përfituesve të shërbimeve, e të tjera.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.