“Rritja e përdorimit të kondicionerëve rrezikon rrjetet globale” – IEA, e shqetësuar për ndikimin e madh që do të prekë sektorin e energjisë

Kristi Ceta/SCAN

 

Agjencia Ndërkombëtare e Energjisë (IEA) ka paralajmëruar se rritja e madhe e përdorimit të kondicionerëve do të ketë një nga ndikimet më të mëdha dhe më të paparashikueshme në rrjetet e energjisë në botë në dekadën e ardhshme.

Studiuesit e Agjencisë deklarojnë se kombinimi i të ardhurave në rritje në vendet në zhvillim dhe temperaturave më të larta për shkak të ndryshimeve klimatike do të sjellë konsum më të lartë të për kondicionerët e shtëpisë, që do të jetë më shumë se totali aktual i përgjithshëm i energjisë elektrike në Lindjen e Mesme.

Në raportin kryesor, Agjencia rriti parashikimet e kërkesës në këtë sektor, duke theksuar se konsumi deri në vitin 2035 do të jetë gjashtë për qind më i lartë se sa ishte vlerësuar vitin e kaluar.

Raporti thotë se kondicionerët do të kërkojnë 697 teravat orë shtesë (TWh) energji elektrike deri në vitin 2030, mbi tre herë më shumë se kërkesa shtesë në krahasim me qendrat e të dhënave. Automjetet elektrike, nga ana tjetër, do të kërkojnë 854 TWh shtesë.

Ndryshueshmëria e kërkesës për kondicionerë nënkupton se ata do të kenë ndikimin më të paparashikueshëm të përditshëm në rrjetet e energjisë. Sipas ekspertëve, shumë vendimmarrës nuk e kuptojnë se sa vendimtarë janë kondicionerët për konsumin e elektricitetit në shkallë globale.

Në SHBA dhe Japoni, 90 për qind e familjeve kanë kondicionerë, ndërsa në Nigeri vetëm pesë për qind, 15 për qind në Indonezi dhe më pak se 20 për qind në Indi. Me rritjen e të ardhurave dhe ndikimin në rritje të ndryshimeve klimatike, gjithnjë e më shumë njerëz po blejnë kondicionerë, duke e shndërruar në një faktor kryesor në rritjen e konsumit.

Edhe në një skenar ku qeveritë përmbushin angazhimet e tyre për klimën, konsumi i energjisë për kondicionerët do të rritet me gati 200 për qind.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.