BE, 42 mld euro/vit për makinat me lëndë djegëse – Sipas studimit, subvencionet kërcënojnë përpjekjet drejt tranzicionit të gjelbër

Kristi Ceta/SCAN

 

Pesë anëtarët më të mëdhenj të BE-së shpenzojnë 42 miliardë euro në vit për të subvencionuar makinat e kompanive me lëndë djegëse fosile, sipas një studimi të porositur nga grupi mjedisor Transport & Environment (T&E). Ky grup bën thirrje për më shumë subvencione drejt automjeteve elektrike.

Makinat e kompanive përbëjnë rreth 60% të shitjeve të makinave të reja në Evropë. Italia jep 16 miliardë euro subvencione për makinat e kompanive me lëndë djegëse fosile, e ndjekur nga Gjermania, e cila siguron 13.7 miliardë euro. Ndërsa Franca dhe Polonia dhanë përkatësisht 6.4 miliardë euro dhe 6.1 miliardë euro në vit.

Kompanitë ofrojnë makina si përfitime për punonjësit, shpesh me subvencione të konsiderueshme përfitimi, duke përfshirë kompensimin e taksave të konsumatorit dhe përfitimet e përdorimit të karburantit. Rreth 15 miliardë euro në të katër vendet shkojnë për subvencionimin e automjeteve sportive, zbuloi studimi. Drejtuesit e makinave të kompanisë marrin një përfitim mesatar vjetor tatimor prej 6,800 eurosh, që varion deri në 21,600 euro për modelet me ndotje më të madhe.

“Kjo është krejtësisht e palogjikshme dhe krejtësisht e papranueshme, që ne jemi ende duke derdhur miliarda para nga taksapaguesit në një teknologji që është krejtësisht kontradiktore me axhendën e tranzicionit të gjelbër të Komisionit Evropian”, tha kreu i grupit mjedisor.

Studimi vjen pasi shitjet e automjeteve elektrike në Evropë kanë rënë, pjesërisht për shkak se ato janë më të shtrenjta se modelet ekuivalente me lëndë djegëse fosile dhe kështu të paarritshme për shumë konsumatorë. Shitjet e makinave plotësisht elektrike ranë 43.9% në Bashkimin Evropian në gusht, pasi tregjet më të mëdha të automjeteve elektrike në Gjermani dhe Francë shënuan rënie prej 68.8% dhe 33.1% respektivisht, sipas të dhënave të industrisë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.