Suplementi i ri mbron bletët nga pesticidet – Studiuesit gjejnë zgjidhjen për t’i mbajtur këto insekte të sigurta nga kimikatet

Kristi Ceta/SCAN

 

Shkencëtarët në Kolumbi thonë se kanë zhvilluar një suplement ushqimor të ri që mbron trurin e bletëve nga pesticidet, duke i mbajtur insektet të sigurta nga dëmtimet neurologjike të shkaktuara nga kimikatet bujqësore. Bletët, si pjalmuese, konsiderohen thelbësore për ruajtjen e ekosistemeve natyrore dhe prodhimin e ushqimit.

Suplementi me bazë bimore i zhvilluar në Universitetin privat të Kolumbisë Rosario në Bogota, në partneritet me Departamentin e Neuroshkencës në Universitetin e Arizonës dhe Universidad Javeriana kolumbiane, u mundëson bletëve të përballen me neurotoksinat që përdoren zakonisht në bujqësi dhe të shmangin dëmtimin e sistemit të tyre motorik dhe kujtesës nga kimikatet.

“Kjo është një zgjidhje për problemin që hasin bletët kur ekspozohen ndaj pesticideve. Ky ushqim i nxit ato të zhvillojnë një mbrojtje,” tha Andre Riveros, profesor i asociuar në Universitetin Rosario.

Formula është krijuar me flavonoidë, metabolitë dytësorë me prejardhje bimore, të njohur për përfitimet e tyre shëndetësore. Pasi ishin vendosur nën efektin qetësues dhe më pas të kufizuara në tuba të vegjël laboratorikë, bletët ushqeheshin nga shkencëtarët gjatë zhvillimit fillestar të suplementit.

Testimi tani është zhvendosur në skenarë të botës reale në një bletore universitare, shpjegoi Juan Jose Ovalle, një student i shkencave natyrore në universitet.

“Ne tashmë e dimë se ka molekula që përmirësojnë shëndetin e bletëve, 0që parandalojnë dëmtimin neuronal të shkaktuar nga pesticidet”, shpjegoi Ovalle, duke shtuar se ishte e rëndësishme të vazhdohej puna për të rritur efektivitetin e këtyre metodave për të mbështetur bletët.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.